.png)
Nga Gazeta ‘Si’- Kryeministri i Shqipërisë, Edi Rama, ka reaguar në platformën X duke komentuar debatin politik të krijuar pas rezolutës së fundit të Parlamentit Europian për çështjet mjedisore dhe zonat e mbrojtura në Shqipëri.
Në reagimin e tij, Rama ironizon kundërshtarët politikë dhe aktivistët mjedisorë, duke i cilësuar si “tam-tamxhinj” dhe duke pretenduar se kanë keqinterpretuar vendimin e eurodeputetëve.
Ai shkruan se “flamingot fitoren e kanë pasur në xhep pa nisur protesta”, ndërsa shton se narrativa për një “fitore të parë” të protestës është, sipas tij, e ndërtuar mbi keqinformim.
Duke iu referuar debatit për zonat e mbrojtura, Rama thekson se amendamenti i miratuar nga Parlamenti Europian nuk lidhet me projektet në zonën e Zvërnecit apo Pishë Poro-Nartë, por specifikisht me zonën Nartë–Vjosë, ku ai deklaron se Qeveria ndan të njëjtin qëndrim me institucionet europiane.
“Dhe kjo nuk është lojë fjalësh me emra vendesh, po është e vërteta e fakteve që burojnë nga dokumentacioni teknik zyrtar, jo nga kanalet sociale. Ndërsa lidhur me rishikimin e ndryshimeve në ligjin për zonat e mbrojtura, europarlamentarët do të informohen se ai është pjesë e agjendës së negociatave dhe si i tillë do të jetë fillimisht në një proces analitik me Komisionin, ku do të identifikojmë çdo pikë që nuk përputhet me kriteret e standartet e BE-së”, shkruan ai.
Ai shton se çështja e ndryshimeve në ligjin për zonat e mbrojtura është pjesë e procesit të negociatave me Bashkimin Europian dhe do të trajtohet në bashkëpunim me Komisionin Europian, në përputhje me standardet e BE-së.
Në fund të reagimit, Rama ironizon edhe debatin publik në rrjetet sociale, duke e cilësuar si “histeri digjitale” dhe duke kritikuar atë që e quan deformim të fakteve nga aktorë politikë dhe publikë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje