.png)
Nga Gazeta ‘Si’- Emigrantët shqiptarë kanë sjellë në atdhe 274 milionë euro gjatë tremujorit të parë të vitit, ose 9.1% më shumë krahasuar me të njëjtën periudhë të një viti më parë.
Banka e Shqipërisë raporton se remitancat vijuan trendin rritës, duke dhënë një kontribut të rëndësishëm në ekonominë e vendit gjatë muajve janar-mars.
Pas një ngadalësimi në periudhën e pandemisë, dërgesat nga jashtë kanë ardhur në rritje, si efekt edhe i emigracionit në rritje të shqiptarëve.
Eurostat e llogarit Shqipërinë si një ndër ekonomitë më të varura nga remitancat, që përbëjnë rreth 10% të PBB-së së vendit. Vlerësohet se burimi kryesor i remitancave për Shqipërinë janë vendet e Bashkimit Europian.
Si një vend i lidhur ngushtë me remitancat, anëtarësimi në SEPA, vlerësohet se do t’i ‘kursejë’ shqiptarëve 70 mln euro vitin e parë, nga ulja e tarifave për transferta. Banka e Shqipërisë shpjegon se për një transfertë prej 5 mijë eurosh, kostoja ka zbritur nga 0.76% në vitin 2024 në vetëm 0.08% në 2025. Praktikisht është rreth 10 herë më lirë, ose afro 90% ulje.
Edhe për transfertat më të mëdha ndryshimi është edhe më i madh. Për 20 mijë euro, tarifa ka rënë nga 0.47% në 0.02%, rreth 23 herë më pak, ose mbi 95% ulje.
Ndërkohë, pak muaj më parë, një studim i Qendrës ALTAX, gjeti se dëmi që ka shkaktuar emigrimi masiv i shqiptarëve, nuk amortizohet dot nga dërgesat e parave që ato sjellin në atdhe. Remitancat kanë një ndikim në konsum 7-8% të PBB-së me një ndikim kryesor në ekonomitë e vogla, por pa një peshë ndikuese në rritjen ekonomike formale. Te ndikimi në treguesit ekonomikë të vendit, shihet se emigracioni ka pakësuar me të paktën 12-15% ofertën e punës në treg.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje