Në ditën e 63-të të protestës së tyre, banorët e zonës së “Astirit” kanë bllokuar sërish rrugën për rreth një orë, në shenjë revolte kundër vendimit të qeverisë për shembjen e shtëpive te “Unaza e Re”.
Në mbështetje të banorëve kanë qenë edhe deputetë të Partisë Demokratike, Klevis Balliu i cili ka bërë apel për bashkim me studentët, të cilët kanë paralajmëruar se ditën e hënë do t’u rikthehen protestave.
“Edi Rama është e keqja, shporreni të keqen, – tha Balliu. – I bëj thirrje edhe kryeprokurores Arta Marku për zbardhjen e aferës së tenderit të një loti të rrugës, që rezultoi se u mor nga një kompani pas falsifikimit të dokumenteve”.
Për rreth një orë banorët kanë bllokuar trafikun. Ata kundërshtojnë prishjen e banesave të tyre siç e parashikon plani për ndërtimin e aksit nga sheshi “Shqiponja” deri te mbikalimi pranë pallatit me shigjeta, si dhe kërkojnë rrëzimin e projektit. Protestuesit kanë lëshuar thirrje kundër qeverisë dhe kryeministrit Edi Rama.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
