.png)
Lufta me Iranin ka krijuar pasiguri të mëdha në tregjet globale të energjisë, duke vendosur çmimet e naftës përballë forcave të kundërta. Nga njëra anë, ndërprerjet e furnizimit nga Lindja e Mesme po shtyjnë çmimet lart, ndërsa nga ana tjetër kërkesa globale po dobësohet për shkak të kostove më të larta të energjisë.
Sipas një analize të publikuar nga banka amerikane e investimeve Goldman Sachs, tregu i naftës përballet me “rreziqe të dyanshme”, ku si skenari i rritjes së mëtejshme të çmimeve, ashtu edhe ai i rënies së tyre, mbeten të mundshëm.
Analistët e bankës, të udhëhequr nga Daan Struyven, vlerësojnë se të dhënat e shitjeve të naftës në Kinë dhe Europën Perëndimore gjatë muajit prill tregojnë një dobësim më të madh të kërkesës sesa ishte parashikuar. Sipas tyre, konsumi global mund të rezultojë rreth 2 milionë fuçi në ditë më i ulët nga sa pritej, çka krijon presion për uljen e çmimeve.
Goldman Sachs vlerëson se ky dobësim i kërkesës mund të reduktojë me rreth 10 dollarë për fuçi parashikimin aktual të bankës, e cila pret që nafta Brent të arrijë mesatarisht 90 dollarë për fuçi në tremujorin e katërt të vitit.
Konflikti me Iranin ka goditur veçanërisht qarkullimin e naftës nga Gjiri Persik. Dërgesat përmes Ngushticës së Hormuzit, një nga arteriet më të rëndësishme të tregtisë globale të energjisë, janë reduktuar ndjeshëm, duke nxjerrë jashtë tregut miliona fuçi prodhim në ditë.
Pikërisht për shkak të këtyre kufizimeve të furnizimit, çmimi i naftës Brent është rritur me më shumë se 25% që nga fillimi i konfliktit në fund të muajit shkurt. Megjithatë, rritja e fortë e çmimeve po sjell një efekt anësor: konsumatorët dhe bizneset po blejnë më pak naftë dhe produkte të saj.
Sipas Goldman Sachs, goditja më e madhe po ndihet në sektorët që varen drejtpërdrejt nga karburantet, veçanërisht në transportin ajror dhe industrinë petrokimike. Kërkesa për karburant avionësh dhe për lëndë të para petrokimike është dobësuar ndjeshëm si rezultat i kostove më të larta.
“Shohim rreziqe të konsiderueshme për rritje të mëtejshme të çmimeve nëse humbjet e furnizimit nga Lindja e Mesme vazhdojnë për një periudhë të gjatë. Por, në të njëjtën kohë, ekziston edhe rreziku i një rënieje të ndjeshme të çmimeve nëse kërkesa globale vazhdon të dobësohet”, thuhet në raport.
Një nga sinjalet më shqetësuese vjen nga Kina, importuesja më e madhe e naftës në botë. Sipas kompanisë konsulente Energy Aspects, importet kineze të naftës pritet të bien këtë vit në rreth 10.9 milionë fuçi në ditë, niveli më i ulët që nga periudha e pandemisë.
Sipas ekspertëve, kjo tregon se një pjesë e kërkesës së humbur mund të mos rikthehet shpejt, edhe nëse tensionet gjeopolitike zbuten.
Megjithatë, tregjet po monitorojnë me vëmendje zhvillimet diplomatike. Nafta Brent tregtohej pranë nivelit të 93 dollarëve për fuçi të hënën, pasi të premten kishte rënë në nivelin më të ulët të gjashtë javëve të fundit. Rënia u nxit nga optimizmi i investitorëve se një marrëveshje paqeje mes Shteteve të Bashkuara dhe Iranit mund të lehtësojë tensionet dhe të rikthejë gradualisht furnizimet në treg.
Për momentin, drejtimi i çmimeve të naftës do të varet nga balanca mes dy faktorëve kryesorë: sa gjatë do të zgjasin problemet e furnizimit nga Lindja e Mesme dhe sa shpejt do të vazhdojë të dobësohet kërkesa globale për energji./Bloomberg
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje