.png)
Nga Gazeta ‘Si’- Kreu i PD, Sali Berisha, ka folur për mediat pas takimit me ekspertët e Komisionit të Venecias, ku u ndal te reforma zgjedhore dhe rekomandimet ndërkombëtare për proceset elektorale në Shqipëri.
Ai tha se çështja e financimit të partive është “më themelorja e procesit zgjedhor”, ndërsa pretendoi se diferenca mes financimeve të PD-së dhe PS-së ka qenë “nga 700 deri në 1 mijë herë”, madje sipas tij “të paktën 2700 herë” nëse përfshihen edhe shpenzimet nga buxheti i shtetit.
Sipas Berishës, gjatë fushatës elektorale, mazhoranca organizoi 4 530 aktivitete në një periudhë të ndaluar nga ligji, me kosto që sipas tij varionin “nga disa qindra euro deri në 7 milionë euro”, duke përmendur edhe organizimin e “Giro d’Italia” një ditë para zgjedhjeve.
Berisha deklaroi se nuk ka ende një draft të dakordësuar mes PS dhe PD për reformën zgjedhore, ndërsa vlerësoi raportin dhe rekomandimet e ODIHR.
Ai theksoi se çështja e depolitizimit të administratës zgjedhore mbetet një temë që do të negociohet.
“Unë s’di të këtë asnjë draft të përbashkët mes PD dhe PS. ODIHR ka sjellë rekomandime të shkëlyera. I mbështes plotësisht. Ka bërë një raport të shkëlqyer që ne e marrim shumë parasysh. Presim edhe rekomadimet e Komisionit të Venecias. Nuk di asnjë dakordësi deri më sot mes drejtuesve të reformës zgjedhore. Problemi i depolitizimit të administratës zgjedhore do negociohet. Ju e morët vesh që patronazhistët u bënë personazh i urryer në raportin e IBAR. A e patë raportin ku damkoseshin rrjetet e patronazhistëve?”, tha Berisha.
“Është e domosdoshme që të konsiderohet një trupë guardiane e ligjit elektoral dhe jo partiake që s’pyet për ligj elektoral”, theksoi kryedemokrati.
I shoqëruar nga Oerd Bylykbashi, Ivi Kaso dhe Albana Vokshi, Berisha akuzoi qeverinë se përdori fondet publike për ndikim elektoral, duke përmendur dhënien e 100 eurove për pensionistët gjatë fushatës, faljen e detyrimeve financiare për mijëra familje dhe biznese, si edhe prokurime publike që sipas tij arrijnë mbi 500 milionë euro.
Ai nuk la pa përmendur edhe raportin e IBAR, ku shtoi se për herë të parë sipas tij po damkosen rrjetet e patronazhistëve të PS-së.
“Censurimi i raporteve ndërkombëtare që damkosin qeverinë dhe mbrojnë qytetarët është një akt i dënueshëm i mafies së fjalës së lirë. Për herë të parë në raportet e BE, damkosen rrjetet patronazhiste. Nuk kam tendence të mohoj asgjë, mbroj interesat e qytetarëve”, tha ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje