.png)
Gazeta Si – Të enjten, Zonja e Parë e SHBA-ve, Melania Trump, mbajti një konferencë të çuditshme për shtyp në Shtëpinë e Bardhë, në të cilën mohoi të kishte ndonjë miqësi me Jeffrey Epstein, financierin e akuzuar për shfrytëzim seksual të dhjetëra vajzave të mitura, i cili kreu vetëvrasje në burg në vitin 2019.
Konferenca për mediat u thirr në mënyrë të papritur dhe i habiti gazetarët dhe njerëzit e industrisë me përmbajtjen dhe kohën e saj.
Epstein kishte qenë objekt diskutimesh të shumta në muajt e fundit, pas publikimit të miliona faqeve që lidheshin me çështjen nga Departamenti i Drejtësisë.
Në atë kohë, bashkëshorti i saj, presidenti i SHBA-ve, Donald Trump, kishte bërë gjithçka që mundi për të larguar vëmendjen nga miqësia e tij e njohur me Epstein dhe për javë të tëra, vëmendja e medias ishte zhvendosur plotësisht në luftën kundër Iranit, e cila deri më tani vetëm sa e ka forcuar regjimin dhe ka krijuar probleme për gjysmën e botës duke bllokuar Ngushticën e Hormuzit. Nuk është e qartë pse Melania Trump ka vendosur t’i rikthehet çështjes tani.
Melania Trump tha se ajo kurrë nuk “ka pasur një marrëdhënie me Epstein” dhe nuk ishte një “viktimë e Epstein”.
Ajo vazhdoi duke thënë se “shpifjet e rreme” që e lidhin atë me Epstein “duhet të ndalen menjëherë”. Ajo kërcënoi me veprime ligjore kundër gazetave dhe faqeve të lajmeve që e raportuan atë (veçanërisht “Daily Beast”, e cila vitin e kaluar raportoi se njohja e saj me Donald Trump lindi nga lidhja e saj me Epstein) dhe i bëri thirrje Kongresit t’u japë grave që vuajtën abuzimin e Epstein “një seancë dëgjimore publike”.
Zonja e Parë shtoi se ajo e njihte financierin vetëm sipërfaqësisht, sepse, “unë dhe Donaldi ftoheshim herë pas here në të njëjtat festa ku ai merrte pjesë”.
Një zëdhënës anonim i Melania Trump, i tha “New York Times” se presidenti e dinte që gruaja e tij do të mblidhte konferencën, por jo temën që do të trajtonte.
Jacqueline Alemany, një gazetare për kanalin televiziv MS NOW, raportoi gjithashtu se Donald Trump i tha asaj në një telefonatë se nuk dinte për çfarë do të fliste Melania.
Edhe gazetarët pranë administratës Trump e përshkruan atë si një veprim të pakuptueshëm dhe të papërshtatshëm.
Jacqui Heinrich, korrespondente e Fox News në Shtëpinë e Bardhë, tha se u përpoq të fliste me të gjitha kontaktet e saj për të kuptuar motivet, por nuk arriti në asnjë përfundim.
“Nuk është e qartë pse zonja e parë zgjodhi të mbante konferencën për shtyp në një kohë kur Shtëpia e Bardhë po përpiqet të largohet nga çështja “Epstein”, e cila ka ndikuar në mandatin e dytë të bashkëshortit të saj”, shkroi “New York Post”, një tabloid konservator i qytetit të Nju Jorkut, që gjithmonë e ka mbështetur Trumpin.
Pavarësisht pretendimeve, nuk ka dyshim se Melania Trump i njihte personalisht si Epsteinin, ashtu edhe Ghislaine Maxwell, ish-partneren e financierit.
Ajo u fotografua disa herë me Epstein gjatë një feste të organizuar në vitin 2000 në Mar-a-Lago Beach, rezidencën luksoze të Donald Trump në Florida.
Dhe në janar, Departamenti i Drejtësisë të SHBA-ve, publikoi një email që Melania Trump i dërgoi Maxwell në vitin 2002 për të komplimentuar një artikull lajkatues në New York Magazine.
Në muajt e fundit, administrata Trump ka marrë kritika të konsiderueshme për trajtimin e ngathët të “dosjeve Epstein”, dokumenteve të mbledhura gjatë gjyqit të Jeffrey Epstein.
Nëntorin e kaluar, pas një fushate të gjatë presioni, Kongresi miratoi një ligj që kërkonte që qeveria të publikonte të gjitha dokumentet.
Më pas, në janar, Departamenti i Drejtësisë publikoi më shumë se tre milionë faqe, 180,000 imazhe dhe 2,000 video.
Ish-Prokurorja e Përgjithshme, Pam Bondi (e shkarkuar nga Trump në fillim të prillit), tha se i kishte zbuluar “dosjet Epstein” në tërësi.
Megjithatë, pas publikimit, u rikthyen kritikat për dështimin për të redaktuar informacionin që mund të kishte identifikuar disa nga gratë që kishin vuajtur nga abuzimi.
Në mars, departamenti publikoi dokumente të reja, duke pretenduar se ato fillimisht ishin lënë jashtë për shkak të një “gabimi klasifikimi”.
Midis tyre ishin disa në të cilat një grua akuzonte Donald Trump se e kishte përdhunuar në vitet 1980, kur ajo ishte midis moshës 13 dhe 15 vjeçe.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje