.png)
Nga Gazeta ‘SI’ – Banka Botërore parashikon që rritja ekonomike e Shqipërisë në vitin 2026 do të jetë 3.4%, duke shënuar kështu nivelin më të ulët të zgjerimit që prej periudhës së pandemisë.
Ky projeksion është më i rezervuar se ai i qeverisë shqiptare, e cila parashikon një rritje prej 3.9%, ndërsa për vitin 2027 institucioni ndërkombëtar pret një përmirësim të lehtë në 3.7%.
Perspektiva ekonomike e vendit mbetet fortësisht e varur nga ecuria e sektorit të turizmit dhe qëndrueshmëria e remitancave, të cilat vazhdojnë të shërbejnë si shtyllat kryesore që mbajnë lart kërkesën e brendshme dhe konsumin.
Në nivel rajonal, Ballkani Perëndimor po përballet me një ngadalësim të ritmeve të rritjes, i ndikuar kryesisht nga rritja e pritshme e çmimeve dhe pasiguria në tregun e energjisë. Megjithëse rajoni ka arritur të ruajë një nivel më të ulët inflacioni krahasuar me pjesë të tjera të Europës dhe Azisë Qendrore, zgjerimi i deficitit të llogarisë korrente dëshmon për një varësi të lartë nga importet.
Për vitin 2026, sfidat kryesore mbeten menaxhimi i goditjeve të mundshme nga tregjet globale dhe nevoja për të transformuar politikat industriale drejt një ekonomie më konkurruese dhe të gjelbër, në funksion të procesit të integrimit europian.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje