.png)
Nga Gazeta ‘Si’– Autoritetet italiane kanë hapur një hetim ndaj rrjetit të dyqaneve të kozmetikës Sephora dhe markës Benefit Cosmetics, të cilat janë pjesë e konglomeratit francez LVMH, për praktikë të dyshuar të marketingut që synon fëmijët dhe adoleshentët.
Hetimi po kryhet nga Autoriteti Italian i Konkurrencës (AGCM) dhe policia financiare italiane, sipas raportimeve të fundit nga agjencitë ndërkombëtare të lajmeve.
Regullatori është i shqetësuar se këto marka po përdorin fëmijë dhe adoleshentë (influencues të rinj) në rrjetet sociale për të promovuar produkte të kujdesit të lëkurës që normalisht janë të dizajnuara për të rritur- përfshirë maska fytyre, serume dhe kremra anti‑plakje duke u kërkuar kështu fëmijëve që të fillojnë përdorimin e këtyre produkteve para kohe.
Kjo, sipas AGCM, mund të kontribuojë në një fenomen të quajtur “cosmeticorexia” -një obsesion i tepruar me produktet kozmetike mes të miturve.
Hetimi gjithashtu po shqyrton nëse brandeve u ka munguar informacioni i nevojshëm ose paralajmërimet për produktet që nuk janë testuar për përdorim nga fëmijët ose adoleshentët, si dhe nëse këto informacione janë prezantuar në mënyrë të pasaktë apo mashtruese në reklamim.
Përdorimi i rremë i imazhit të produkteve për të tërhequr klientë të rinj pa ndihmuar konsumatorët të kuptojnë rreziqet e mundshme është një nga shqetësimet kryesore që autoritetet po ndjekin.
Si pjesë e kontrolleve, inspektorë të AGCM dhe policisë financiare kanë kryer kontrollime në zyrat e Sephora Italia, LVMH Profumi e Cosmetici Italia dhe LVMH Italia, në përpjekje për të mbledhur prova lidhur me praktikat e marketingut të dyshuara. Kompanitë ende nuk kanë dhënë një koment zyrtar në përgjigje të pyetjeve të bëra nga autoritetet.
Ky hetim ndodh në një kohë kur shqetësimet për marketingun e produkteve të bukurisë drejt fëmijëve dhe adoleshentëve po shtohen globalisht, veçanërisht me rritjen e ndikimit të rrjeteve sociale dhe influencuesve të rinj që promovojnë produkte të kujdesit të lëkurës./ Financial Times
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje