.png)
Nga Gazeta ‘SI’ – Organizata Botërore për Ekonomi dhe Zhvillim, OECD parashikon se konflikti në Lindjen e Mesme do të ngadalësojë rritjen ekonomike botërore.
Parashikohet që rritja globale të ngadalësohet në 2.9% në vitin 2026 dhe të rritet lehtë në 3.0% në 2027. Rritja do të ndikohet negativisht nga kostot më të larta të energjisë dhe pasiguritë gjeopolitike, pavarësisht mbështetjes nga investimet teknologjike dhe ulja e disa tarifave.
Në Shtetet e Bashkuara, rritja pritet të bjerë nga 2.0% në 1.7%, ndërsa në eurozonë të ngadalësohet në 0.8% përpara se të rikuperohet. Kina pritet të ruajë ritme më të larta, por në rënie graduale.
Inflacioni në vendet e G20 pritet të arrijë në 4.0% në 2026 dhe të bjerë në 2.7% në 2027, nëse presionet nga energjia zbuten.
Rreziqet kryesore mbeten përkeqësimi i konfliktit dhe ndërprerjet e zgjatura të furnizimit me energji, që mund të rrisin më tej inflacionin dhe të ulin rritjen ekonomike. Nga ana tjetër, një zgjidhje më e shpejtë e konfliktit ose investime më të forta në teknologji mund të përmirësojnë perspektivën.
Bankat qendrore pritet të mbeten vigjilente për të mbajtur inflacionin nën kontroll, ndërsa qeveritë duhet të mbështesin shtresat më të prekura pa dëmtuar stabilitetin fiskal.
Përshkallëzimi i konfliktit në Lindjen e Mesme po sjell kosto të mëdha njerëzore dhe ekonomike për vendet e përfshira, ndërsa po vë në provë qëndrueshmërinë e ekonomisë globale. Ndërprerjet e mundshme në ngushticën e Hormuzit dhe dëmtimi i infrastrukturës energjetike kanë shkaktuar rritje të ndjeshme të çmimeve të energjisë dhe kanë ndërprerë furnizimin global me energji dhe mallra të rëndësishëm, si plehrat kimike.
Tregjet financiare janë bërë më të paqëndrueshme, veçanërisht në disa ekonomi aziatike, ndërsa kushtet financiare janë shtrënguar, edhe pse mbeten përgjithësisht mbështetëse si në ekonomitë e zhvilluara ashtu edhe në ato në zhvillim.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje