.png)
Nga Gazeta ‘SI’ – Shqiptarët shpenzuan rreth 210 miliardë lekë përmes transaksioneve online gjatë muajit të parë të vitit 2026.
Sipas të dhënave të publikuara nga Banka e Shqipërisë, gjatë janarit qytetarët kryen rreth 950 mijë pagesa dhe transferta përmes internetit, të njohura ndryshe si shërbime “homebanking”. Krahasuar me fundin e vitit 2025, shifrat tregojnë një tkurrje të lehtë të përdorimit të këtij shërbimi. Megjithatë, në raportin vjetor rezulton se shpenzimet online janë rritur me rreth 5 përqind.
Sipas Anketës së Përdorimit të Teknologjisë së Informacionit, të publikuar në dhjetor 2025, përdorimi i internetit për tregti vazhdon të rritet. Më shumë se 45 përqind e shqiptarëve kanë kryer të paktën një blerje online gjatë 12 muajve të fundit, një rritje me tre pikë përqindje krahasuar me vitin e mëparshëm.
Produktet më të blera online mbeten rrobat dhe shërbimet e dërgesës së ushqimit, të cilat dominojnë tregun me përkatësisht 97 dhe 61 përqind të preferencave.
Përveç blerjeve, edhe aktivitete të tjera në internet kanë shënuar rritje të ndjeshme. Kërkimi i informacionit për mallra dhe shërbime është rritur me 10.7 pikë përqindje, përdorimi i shërbimeve e-banking me 7.7 pikë përqindje, ndërsa rrjetet sociale me 5.7 pikë përqindje. Të dhënat tregojnë një varësi gjithnjë e më të madhe të qytetarëve nga shërbimet digjitale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje