.png)
Gazeta Si – Péter Magyar, eurodeputet dhe udhëheqës i partisë kryesore opozitare të Hungarisë, Tisza (Partia e Respektit dhe Lirisë), ka akuzuar qeverinë e udhëhequr nga Viktor Orbán se e ka kërcënuar me publikimin e një videoje të dyshuar që e tregon atë duke kryer marrëdhënie seksuale me një grua.
Videoja dyshohet se është filmuar pa dijeninë e të dyve në vitin 2024, por ende nuk është publikuar dhe aktualisht nuk ka prova për ekzistencën e saj.
Megjithatë, Magyar tha se ditët e fundit, disa gazetarë morën një link që tregonte një foto të dhomës, ku ndodhi marrëdhënia seksuale.
Magyar dhe gruaja e përfshirë, Evelin Vogel, konfirmuan të dy se kishin kryer marrëdhënie seksuale në dhomën e treguar në foto.
My statement regarding the latest government and secret service smear campaign currently unfolding. pic.twitter.com/wUr8PIPZ8l
— Magyar Péter (Ne féljetek) (@magyarpeterMP) February 12, 2026
Sipas Magyar, partia e Orbán po përpiqet ta minojë atë politikisht për të humbur mbështetjen përpara zgjedhjeve parlamentare të planifikuara për 12 prill. Për momentin, Tisza, partia e Magyar, po performon shumë mirë në sondazhe.
Magyar nuk është i martuar, kështu që skandali që rrethon publikimin e videos së dyshuar nuk do të lidhej me një tradhëti të mundshme bashkëshortore.
Megjithatë, Hungaria është një vend shumë konservator dhe publikimi i videos mund të ketë pasoja politike për kundërshtarin kryesor të Orbán-it.
Ekziston edhe një problem tjetër. Magyar tha se në apartament kishte “substanca që dukeshin si drogë”, por shtoi se nuk i kishte përdorur ato.
Ekzistojnë disa aspekte të tjera të paqarta rreth kësaj çështjeje, siç është marrëdhënia midis Magyar dhe Evelin Vogel.
Magyar më parë e kishte akuzuar Vogel se e kishte shantazhuar duke e kërcënuar se do të publikonte regjistrime audio të bisedave private për shtypin, një pretendim që ajo e mohoi.
Magyar pretendoi se dyshonte që në fillim se kishte qenë viktimë e një “operacioni në stilin rus”. Me “operacion në stilin rus”, Magyar i referohet shantzhit, një praktikë e përdorur gjerësisht në të kaluarën me anë të së cilës qeveria ruse shantazhon dhe diskrediton kundërshtarët e saj duke mbledhur materiale kompromentuese rreth tyre.
Orbán dhe qeveria e tij deri më tani nuk kanë komentuar për këtë çështje, por disa anëtarë të partisë së kryeministrit, Fidesz, kanë mohuar akuzat e Magyar.
Orbán ka qenë në qeveri që nga viti 2010 dhe me kalimin e viteve e ka bërë Hungarinë një vend gjithnjë e më joliberal.
Fushata zgjedhore filloi zyrtarisht të dielën, por Orbán dhe Magyar kanë sulmuar njëri-tjetrin që nga viti 2024: Tisza është më pro-europiane se Fidesz dhe Magyar akuzon rregullisht Orbán se është një politikan i korruptuar.
Orbán, nga ana tjetër, pretendon se Magyar synon të tradhtojë interesat kombëtare të Hungarisë për të favorizuar Bashkimin Evropian.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
