.png)
Nga Gazeta ‘Si’- Ministrja e Arsimit Mirela Kumbaro në përgjigje të interpelancës së kërkuar nga deputetja Erisa Xhixho dhe deputeti Erald Kapri lidhur me sigurinë në shkolla, vuri theksin tek rritja dhe garantimi i sigurisë për nxënësit.
Xhixho bën me faj qeverinë për mosmarrjen e masave të nevojshme për garantimin e sigurisë dhe përdorimin e rasteve për qëllime politike.
“Rastet e fundit, tragjedia në Durrës, një gjimnazist u godit me thikë në zemër nga një bashkëmoshatar. Në Shkodër një përleshje masive mes adoleshentëve. Në Kamës dy 16-vjeçarë mbetën të plagosur. Armët e ftohta, konsumi i drogës janë bërë shqetësime të zakonshme. 2750 raste dhune janë raportuar në shkollat e vendit 2022-2023. Qeveria nuk ka reflektuar dhe nuk ka marrë masa reale.
Fatkeqësia e Martin Canit u përdor për propagandë. Sot shqiptarët duan përgjigje, jo propagandë dhe jo censurë”, tha Xhixho.
Kumbaro në replikë tha se sipas saj fenomeni i dhunës tek të miturit nuk është problem i izoluar por përjetohet kudo dhe akuzoi opozitën se po i përdor fëmijët në protesta.
Mandej, teksa prezantoi planin kombëtar për shkollat ajo foli për rritjen e numrit të punonjësve socialë nëpër shkolla, të oficerëve të sigurisë dhe të programeve sociale të ngritura me qëllim mbështetjen e edukimit dhe të uljes apo izolimit të rasteve problematike.
“Prania e oficerëve të sigurisë është forcuar ndjeshëm dhe po shoqërohet me standarde të reja pune dhe etike profesionale.
Këta oficerë nuk janë më thjesht figura kontrolli, por pjesë e mekanizmit të parandalimit dhe ndërhyrjes së hershme ne bashkëpunim te ngushte me mësues, psikologe e punonjës sociale.
Megjithëse shkolla shqipe ka një traditë të gjatë, Oficeri i Sigurisë është figure e re, nuk ka qenë tradicionalisht një figurë e shkollave tona. Ashtu sikundër edhe punonjësit psiko-socialë! Dhe pikërisht tre javë më parë, shpallëm 62 vende të lira pune për Oficerë Sigurie pranë shkollave tona. Paralelisht, është ndërtuar një strukturë e qartë koordinimi mes drejtorive arsimore dhe Policisë së Shtetit, për të garantuar reagim në kohë reale dhe shkëmbim të vazhdueshëm informacioni.
Vendimi për ndalimin e përdorimit të telefonave celularë në ambientet shkollore nuk duhet parë si masë ndëshkuese, por si një ndërhyrje edukative dhe mbrojtëse. Një tjetër shtyllë themelore e planit ka qenë fuqizimi i shërbimit psiko-social në shkolla. Po ashtu është investuar në ndërtimin e rrjeteve të mbështetjes digjitale dhe mekanizmave të komunikimit të shpejtë.
Platforma SMIP – ku prindërit hyjnë në çdo kohë dhe kontrollojnë në kohë reale ecurinë e fëmijëve të tyre në shkollë – si edhe Fletorja e Komunikimit Online kanë krijuar një urë të drejtpërdrejtë mes shkollës dhe familjes, duke e bërë më të lehtë identifikimin e problematikave dhe adresimin e tyre në kohë”, tha ministrja Kumbaro”, shtoi po ashtu Kumbaro.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
