.png)
Gazeta Si – Dy të rinj, 20 dhe 24 vjeç, u arrestuan në fundjavë, si të dyshuar për vrasjen e 45-vjeçarit shqiptar Marko Beka, ngjarje e ndodhur të shtunën në Larum, në qendër të fshatit Geel të Belgjikës.
Sipas mediave belge, shërbimet e emergjencës u përpoqën ta ringjallnin viktimën, por pa sukses. Shoferi i taksisë vdiq në vendngjarje nga plagët e marra me armë zjarri në rrethana të paqarta deri tani.
Policia Federale Gjyqësore (FGP) e Anversës kreu hetime të mëtejshme dhe kreu disa kontrolle shtëpish fundjavën e kaluar.
“Të shtunën dhe të dielën, FGP arrestoi dy burra, të moshës 20 dhe 24 vjeç, nga Merksem dhe Geel”, vazhdon zëdhënësi i policisë, Aerts, pa specifikuar kombësinë e tyre.
“Pas marrjes në pyetje, ata u sollën para gjyqtarit hetues të dielën dhe u arrestuan me dyshimin për vrasje. Kryetari i trupit gjykues do të vendosë për këtë arrestim të premten”.
Hetimi penal vazhdon. “Në këtë kohë, është ende e paqartë se kush qëlloi të shtënën fatale dhe cili ishte motivi i të shtënave”, përfundon Aerts.
Marko Beka ishte babai i tre fëmijëve, të moshave 5, 11 dhe 17 vjeç, dhe drejtonte një biznes privat taksish në Geel.
Bashkëshortja e tij, Izabela, e përshkruan atë si një njeri të qetë, të sjellshëm dhe shumë social, i dashur për komunitetin dhe pa konflikte me askënd.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
