Nga Gazeta “SI”- Publikohet traileri i parë i filmit The Odyssey, adaptimi epik i Odiseas së Homerit nga regjisori Christopher Nolan. Trailer-i i plotë, i publikuar online nga Universal Pictures, ofron një pamje të errët dhe emocionale të legjendës greke.
Me Matt Damon në rolin e heroit mitik Odiseu, traileri fokusohet kryesisht në periudhën menjëherë pas përfundimit të Luftës së Trojës. Odiseu shfaqet si një njeri i thyer nga vitet e luftës, i lodhur dhe i dëshpëruar për t’u kthyer te familja e tij, duke deklaruar në një zë narrativ me ton të ashpër: “Pas vitesh lufte… askush nuk mund të qëndronte mes njerëzve të mi… dhe shtëpisë… as unë vetë.”
Pamjet e traileri-t tregojnë Damon-in me mjekër teksa përballet me rrugëtimin e gjatë dhe të rrezikshëm drejt Itakës, duke luftuar kundër stuhive dhe pengesave të shumta në det, ndërsa anijet prej druri përpiqen të mbijetojnë mes dallgëve gjigante. Në skenat e shkurtra shfaqen Anne Hathaway si Penelopë, bashkëshortja e Odiseut, dhe Tom Holland si Telemaku, djali i tij.
Publikimi i këtij traileri vjen pas një sekuence gjashtëminutëshe që u shfaq ekskluzivisht në kinema më 12 dhjetor, ndërsa më herët një trailer kinematografik kishte rrjedhur online. Traileri i sapopublikuar duket dukshëm i ndryshëm dhe pason zbulimin e Nolanit se gjatë xhirimeve ai përdori dy milionë këmbë filmi me kamera IMAX, duke e çuar realizmin vizual në kufijtë maksimalë.
Ndërkohë, fansat kanë reaguar me humor dhe zhgënjim. Disa kanë shprehur habi mbi kronologjinë e tregimit, duke pyetur pse regjisori nuk e filmoi fillimisht Iliadën dhe pastaj Odiseun, ndërsa të tjerë shprehin emocionin e pritjes për një vazhdim të mundshëm:
“Mezi po e pres Odisea 2: Këtë herë është personale.” Shkruan Tom Roger me humor në rrjetin social facebook.
Disa nuk i fshehin nostalgjinë për versionet imagjinare të historisë:
“Duket pikërisht ashtu siç e imagjinoja në moshën 14-vjeçare, pa e lexuar librin për orën e anglishtes.” shkruan dikush tjetër.
Një pjesë e komentuesve ironizojnë mbi mënyrën e efekteve vizuale të përdorura , duke vënë në dukje:
“Duke e parë në telefon, ashtu siç e kishte parashikuar Nolan,”.
Por nuk mungojnë edhe memet si: “LMAO, aventurat e Batmanit vazhdojnë.” Duke ironizuar në këtë mënyrë helmetën e Odiseut.
Filmi pritet të dalë në kinema më 16 korrik 2026 në Australi dhe më 17 korrik 2026 në Mbretërinë e Bashkuar dhe Shtetet e Bashkuara.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
