.png)
Gazeta Si – Këtë të premte, 5 dhjetor, në orën 18:00 (me atë shqiptare), shorti për fazën e grupeve të Kupës së Botës, i planifikuar për verën e ardhshme midis Meksikës, Shteteve të Bashkuara dhe Kanadasë, do të mbahet në Uashington.
Besohet gjerësisht se do të jetë kryesisht një ngjarje amerikane, e monopolizuar nga presidenti i SHBA-ve, Donald Trump dhe propaganda e tij, falë pjesërisht mbështetjes së FIFA-s (organizata që qeveris futbollin botëror) dhe presidentit të saj, Gianni Infantino, i cili është i njohur për afërsinë e tij me Trump.
Ndikimi i Trump do të jetë i dukshëm që në short, duke filluar me zgjedhjen e vendit: “Kennedy Center”, një qendër artesh performuese me pamje nga lumi Potomac, pranë Watergate.
Që nga fillimi i mandatit të tij të dytë, Trump e ka bërë objektin në pronësi të qeverisë “selinë e tij të pushtetit”.
Shkurtin e kaluar, ai ndryshoi bordin e drejtorëve që menaxhon “Kennedy Center”, duke e mbushur atë me aleatët e tij, duke e emëruar veten president dhe bashkëpunëtorin e tij, Ric Grenell si drejtor ekzekutiv.
Eventi paraqet dy ngjarje mjaft të pazakonta që kanë krijuar shumë bujë ditët e fundit. Të mërkurën, FIFA njoftoi një performancë nga grupi i famshëm pop Village People, kënga më e famshme e të cilit, “YMCA”, është një nga kolonat zanore kryesore të tubimeve të Trump.
Krahas tyre do të performojnë Andrea Bocelli, Robbie Williams, Nicole Scherzinger dhe, si prezantues, komediani Kevin Hart, ish-modelja Heidi Klum dhe aktori Danny Ramirez.
Zhvillimi i dytë i çuditshëm rreth shortit të Kupës së Botës ka të bëjë me “Çmimin e Paqes”, të cilin FIFA do ta japë për herë të parë këtë vit.
Vetë Infantino e bëri njoftimin në fillim të nëntorit, më pak se një muaj pasi u dha Çmimi Nobel për Paqen dhe shumica e gazetarëve ndërkombëtarë menjëherë spekuluan se çmimi ishte krijuar për të “kompensuar” Trumpin për humbjen e tij.
Është marrë si e mirëqenë që çmimi do t’i shkojë Trumpit. Organizata joqeveritare “Human Rights Watch”, për shembull, i ka dërguar FIFA-s një kërkesë për sqarime mbi kriteret e dhënies së çmimit, por ende nuk ka marrë një përgjigje.
Në fakt, “The Athletic” raportoi se asnjë nga 37 anëtarët e Këshillit të FIFA-s, tetë nënkryetarët dhe 28 anëtarët e zgjedhur të organizatës nuk ishin informuar për çmimin.
Sipas gazetës “The Guardian”, një rol qendror në dhënien e çmimit luajti, përveç Infantinos, një komitet i kryesuar nga kreu i Federatës së Futbollit të Myanmarit, Zaw Zaw: një miliarder tashmë nën sanksione në Shtetet e Bashkuara dhe Bashkimin Evropian dhe i akuzuar për lidhje të ngushta me juntën ushtarake që sundon Myanmarin.
Pastaj është edhe çështja e pranisë së delegacionit iranian. Irani është një nga dymbëdhjetë vendet e prekura nga ndalimi i udhëtimit i lëshuar nga Trump qershorin e kaluar, që do të thotë se qytetarëve të tij u ndalohet hyrja në Shtetet e Bashkuara.
Administrata amerikane më vonë sqaroi se ndalimi nuk vlen për sportistët, trajnerët dhe menaxherët e përfshirë në garat ndërkombëtare sportive, siç është Kupa e Botës.
Megjithatë, disa anëtarëve të Federatës Iraniane të Futbollit, përfshirë presidentin Mehdi Taj, iu mohuan vizat për të marrë pjesë në shortin në Uashington, duke bërë që i gjithë delegacioni të kërcënonte se do ta bojkotonte ngjarjen.
Të enjten, BBC Sports raportoi se vetëm trajneri i Iranit, Amir Ghalenoei, dhe një zyrtar federal do të jenë të pranishëm në “Kennedy Center”.
Problemi rrezikon të përsëritet verën e ardhshme gjatë turneut, të paktën për tifozët, të cilët nuk janë të përjashtuar nga ndalimi i udhëtimit.
Kjo situatë prek edhe Haitin, ekipi kombëtar i të cilit u kualifikua për turneun për herë të parë që nga viti 1974, ndërsa vendi po përjeton pasiguri të rëndë dhe paqëndrueshmëri politike.
Haiti është gjithashtu një nga 12 vendet, qytetarëve të të cilave u është ndaluar hyrja në Shtetet e Bashkuara.
Trump synon gjithashtu të lërë gjurmën e tij në Kupën e Botës në mënyra të tjera, siç është përzgjedhja e njëmbëdhjetë qyteteve amerikane që do të presin ndeshjet.
Zyrtarisht, të gjitha janë shpallur tashmë në vitin 2022, por në muajt e fundit, Trump ka kërcënuar të zhvendosë turneun nga disa qytete, në të tjera, nëse autoritetet lokale nuk mund të garantojnë sigurinë e ngjarjes (sipas kritereve të tij). Qytetet e synuara drejtohen të gjitha nga demokratët: Bostoni, Seattle dhe San Francisco.
Tetorin e kaluar, Victor Montagliani, nënkryetar i FIFA-s dhe president i konfederatës së Amerikës së Veriut CONCACAF, e mohoi këtë mundësi, duke thënë se vendimi për vendet e Kupës së Botës i takon vetëm FIFA-s.
Muajin pasardhës, Infantino i dha të drejtë Trumpit, duke pranuar se organizata mund të ndryshojë qytetet pritëse me kërkesë të presidentit të SHBA-ve.
Vendi i finales me siguri do të mbetet i pandryshuar, me sfidën që do të luhet në stadiumin “MetLife” në East Rutherford, New Jersey.
Stadiumi është vetëm 16 kilometra larg Kullës Trump në Manhattan, ku FIFA hapi një zyrë përfaqësimi verën e kaluar.
Dhënia e finales së Kupës së Botës stadiumit “MetLife” është kryesisht falë Jared Kushnerit, dhëndrit të Trump dhe një banor i New Jersey, i cili koordinoi komitetin e dedikuar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
