.png)
Nga Gazeta Si- Sekretari i Shëndetësisë në Britani thotë se nuk ndihet i qetë me depërtimin me forcë të familjeve sipas planeve të emigracionit të sekretarit të brendshëm, ndërkohë që pohon se kjo është ende gjëja e duhur për t’u bërë.
Wes Streeting, kur u pyet nëse ndjehej rehat me një politikë që dhjetëra laburistë e kundërshtojnë, ai tha se “sinqerisht rehat nuk ndjehem por kjo është gjëja e duhur për tu bërë”.
Në një intervistë me LBC, ai tha se Shabana Mahmood po “sigurohej që ne, aty ku njerëzit nuk kanë të drejtë të jenë këtu, po i deportojmë ata, por edhe po i mbështesim ata që të zhvendosen gjithashtu… kështu që në fakt numri i largimeve me forcë duhet të jetë i ulët”.
The Guardian shkruan se komentet e Streeting duket se sinjalizojnë se ai ka mirëkuptim për disa nga shqetësimet e deputetëve të Partisë Laburiste, disa prej të cilëve kanë ngritur shqetësime për familjet që largohen me forcë nëse refuzojnë stimujt financiarë për t’u kthyer në vendin e tyre.
Keir Starmer dhe Mahmood po përballen me kërcënimin e një revolte për politikën në një kohë kur e majta e butë e partisë po shpreh pakënaqësi në rritje me udhëheqjen e Partisë Laburiste.
“Politika u kritikua gjithashtu ndërkombëtarisht të mërkurën kur kryeministri i Shqipërisë, Edi Rama, akuzoi Mahmood për “stereotipizim etnik” dhe “demagogji të pahijshme””, shkruan The Guardian, duke shtuae se Rama vuri në dyshim se si një politikan i Partisë Laburiste mund ti bënte “jehonë kaq dobët retorikën e së djathtës ekstreme populiste” pasi zyrtarët e Mahmood veçuan 700 familje shqiptare për deportim.
Një burim nga qeveria shqiptare tha për The Guardian se kishte tensione në rritje midis qeverive të Shqipërisë dhe Mbretërisë së Bashkuar, pavarësisht bashkëpunimit të suksesshëm mbi politikat e imigracionit.
Sulmi i Ramës ka shkaktuar gjithashtu shqetësim në Ëhitehall, sepse Ballkani Perëndimor shihet si një rrugë kryesore tranziti për azilkërkuesit që përpiqen të arrijnë në Mbretërinë e Bashkuar.
Oficerët e sigurisë kufitare të Mbretërisë së Bashkuar u dërguan në Shqipëri, Serbi, Mal të Zi, Kosovë, Maqedoni të Veriut dhe Bosnjë e Hercegovinë gjatë verës për të ndërtuar lidhje dhe për të mbledhur informacione mbi bandat e kontrabandës.
Duke njoftuar politikën e azilit të hënën, Mahmood tha: “Ne duhet të largojmë ata që kanë dështuar në kërkesat për azil, pavarësisht se kush janë ata”.
“Sot, ne nuk po largojmë grupe familjare, edhe kur e dimë se vendi i tyre i origjinës është plotësisht i sigurt. Ka, për shembull, rreth 700 familje shqiptare që jetojnë në strehim të financuar nga taksapaguesit që kanë dështuar në kërkesat e tyre për azil, pavarësisht një marrëveshjeje ekzistuese kthimi dhe Shqipërisë që është nënshkruese e konventës evropiane për të drejtat e njeriut. Pra, tani do të fillojmë largimin e familjeve. Kur është e mundur, ne do të inkurajojmë një kthim vullnetar, por aty ku është i nevojshëm një kthim i detyruar, kjo është ajo që do të bëjmë.”
Ministria e Brendshme ka pohuar se ka rreth 700 familje shqiptare në Mbretërinë e Bashkuar pa të drejtë qëndrimi në vend, por deri më tani Ministria e Brendshme ka zgjedhur të mos i japë përparësi dërgimit të tyre në shtëpi.
Kërkesat për azil nga shqiptarët mbeten të ulëta dhe ka pasur një rënie prej më shumë se 90% në mbërritjet e shqiptarëve me varka të vogla që nga viti 2022.
Andi Hoxhaj, bashkëpunëtor i The Guardian nga Instituti Mbretëror i Shërbimeve të Bashkuara, tha se qeveria e Mbretërisë së Bashkuar duket se po synon dhe veçon shqiptarët në retorikën e saj.
“Ne pamë të njëjtën çështje nën administratën e mëparshme Konservatore dhe si komuniteti shqiptar ashtu edhe qeveria shqiptare janë thellësisht të frustruar nga kthimi i këtij rrëfimi. Kjo retorikë duket se është gjithnjë e më e lidhur me shtytjen e qeverisë për të riinterpretuar ose reformuar dispozitat e KEDNJ-së mbi të drejtat e familjes, duke përdorur shqiptarët si shembull për të bërë një argument më të gjerë politik, siç kanë bërë Reforma dhe Konservatorët duke përdorur shqiptarët si shembull”, thotë Hoxhaj për median britanike, duke shtuar se, duke përmendur konkretisht Shqipërinë, sekretarja e brendshme po i përgjigjet gjithashtu edhe mesazheve të Farage, pasi ai i ka bërë shqiptarët një pjesë qendrore të retorikës së tij.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
