.png)
Gazeta Si – E tëra që mungon është një video në stilin e Gazës. Por dikush do ta postojë herët a vonë: një Donald Trump, plot pije dhe muzikë, duke shijuar perëndimet e diellit mbi lumin Sava, me partnerin e tij të ri në biznes, presidentin serb, Aleksandar Vuçiç, duke pushuar pranë tij, jo Netanjahut.
Në horizont, Dubai i shkëlqyer ballkanik që do të ndërtohet në Beograd: një hotel i bukur i markës “Trump” prej 500 milionë dollarësh, 175 dhoma dhe 1,500 apartamente ultra-luksoze.
Një vendpushim në zemër të kryeqytetit, sipër rrënojave të Generalstab, ndërtesës së vjetër të Shtabit të Përgjithshëm të Ushtrisë Serbe, ndërtesa që simbolizonte anti-amerikanizmin dhe u bombardua nga NATO në luftën e vitit 1999.
“Është një projekt që do të ndihmojë marrëdhëniet tona me SHBA-në”, – premton populisti Vuçiç. “Po e shesim historinë tonë për ta zëvendësuar atë me kazino dhe xhakuzi”, proteston opozita.
Është sigurisht marrëveshja më e mirë që diplomacia e pasurive të patundshme e Trump ka arritur të sigurojë në Ballkan. Ndërton hotelin më të madh Trumpian në Evropë. Donald e kishte pikasur atë që nga viti 2013, madje edhe para presidencës së tij të parë.
Dhe hetimet e prokurorëve serbë për abuzim me pushtetin nuk dhanë asnjë dobi. As kufizimet e vendosura nga mbikëqyrësit mbi rrënojat e një ndërtese të vitit 1956, një kryevepër e modernizmit, nuk patën sukses.
Duke përdorur një ligj të veçantë, Vuçiç mori miratimin emergjent për projektin në Parlament: rafineria e vetme e Serbisë është nën sanksione të SHBA-ve dhe kërkon një leje të veçantë “në stilin Orbán” nga Shtëpia e Bardhë për t’i bërë ballë dimrit të ftohtë ballkanik.
Deri më tani, askush nuk kishte dashur ta prekte ndërtesën në Kneza Milosa, “një shembull i arrogancës amerikane”: rrënojat mbetën atje, një paralajmërim i përhershëm nga një Serbi që nuk e ka pranuar kurrë humbjen e Kosovës, por as që nuk i ka harruar as raketat. Por jemi në epokën e Trumpit dhe gjithçka, nëse nuk falet, fshihet me një të rënë të lapsit.
Marsin e kaluar, Donald Trump Jr., një sipërmarrës i Organizatës Trump, zbarkoi në Beograd, u takua me Vuçiçin dhe e vulosi marrëveshjen me një shtrëngim duarsh: Generalstab do të shembet plotësisht, me një kontratë qiraje 99-vjeçare dhe 22% të fitimeve që shkojnë për qeverinë serbe. I vetmi lëshim ndaj së kaluarës, është një memorial kushtuar viktimave të vitit 1999.
Ka diçka përtej konfliktit të interesit. Dhëndri i Trumpit, Jared Kushner, me kompaninë e tij “Affinity Global Development”, do të jetë përgjegjës për ndërtimin e hotelit.
Negociatat për vendin e ndërtimit u zhvilluan nga Brad Pascale, një strateg për fushatat zgjedhore të Trumpit dhe një konsulent për rizgjedhjen e Vuçiçit në vitin 1922.
Udhëtimi i Trumpit të vogël në Evropë, i shoqëruar nga e dashura e tij Bettina, u pagua rastësisht nga Pascale.
Dhe Donald Jr. shfrytëzoi vizitën për të shprehur mbështetje politike për qeverinë serbe, të akuzuar për korrupsion dhe subjekt i protestave masive në rrugë.
Gazeta “The New York Times” shkroi se misioni i djalit të presidentit në Serbi të kujtonte marrëveshjet e biznesit të Hunterit, pasardhësit të Joe Bidenit – njeriun që Trump dhe republikanët e akuzuan për shfrytëzimin e pozicionit të babait të tij.
“Donald i ri”, komentoi Dragan Joniç, një deputet i opozitës, “erdhi në Beograd për t’i dhënë një dorë Vuçiçit. Sepse Vuçiç po përpiqej të qëndronte në pushtet. Dhe sepse Trumpët donin t’i mbanin bizneset e tyre në det”.
Lakmia serbe nuk është asgjë e re për Shtëpinë e Bardhë. Që në vitin 2020, serbët dhe kosovarët u thirrën në Uashington për të nënshkruar një lloj marrëveshjeje paraprake paqeje dhe Richard Grenell, një mbështetës i flaktë i Trumpit, përmendi rindërtimin e pallatit të bombarduar.
“Ne duam të zgjerojmë praninë tonë në Evropë”, parashikoi gjithashtu një tjetër djalë i presidentit, Eric, duke njoftuar se marrëveshja do të përfshinte një zhvillues nga Emiratet e Bashkuara Arabe, Mohammed Alabbar, i cili ka ndërtuar në Beograd për vite me radhë.
Përpara rrënojave të Generalstab, duke pritur buldozerët, ata varën një banderolë proteste: “Shpëtoni historinë tonë”.
Ishte shkruar nga disa nacionalistë serbë, të cilët mbështetën Vuçiçin dhe tani e quajnë tradhtar: “Kjo ndërtesë është kujtimi i traditave tona ushtarake”, thonë ata.
“Ne i kërkojmë Trumpit vetëm një gjë: a do t’ia shisnit Akademinë West Point një kompanie pasurish të paluajtshme?”
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
