.png)
Nga Gazeta ‘SI’ – Në periudhën janar-shtator 2025, shqiptarët blenë pak më shumë se 43 mld lekë nga borxhi i qeverisë, në formën e titujve të investimit. Kjo vlerë është rritur me 2% nga një vit më parë.
Sipas shifrave nga Autoriteti i Mbikëqyrjes Financiare, AMF, numri i transaksioneve ka rënë me rreth 17%.
Shifrat tregojnë se Bonot e Thesarit 12-mujore janë investimi më i preferuar, me rreth 23 mld lekë të investuara aty. Obligacionet 7-vjeçare dhe ato 2-vjeçare kanë tërhequr po ashtu investitorë, respektivisht me 3.5 dhe 3.2 mld lekë të investuara.
AMF tregon se ka një rënie të interesit nga qytetarët e thjeshtë, pra klientët joprofesionistë, transaksionet e të cilëve janë pakësuar me 25% nga një vit më parë, por ka një rritje të bleësve të kualifikuar.
Përgjatë 2 viteve të fundit, yield-et e letrave me vlerë kanë qenë në nivele minimale, shumë pranë normës së interesit, duke e bërë këtë investim jo shumë tërheqës për qytetarët.
Në një raport të Politikës Monetare, Banka e Shqipërisë theksonte se rënia e yield-eve të titujve vjen si pasojë e një kërkese më të lartë nga investitorët se sa nevoja e qeverisë për financim. Pritjet për një klimë financiare pa rreziqe, kanë ndikuar gjithashtu në reduktimin e interesit për investimin në borxhin e qeverisë.
Prej disa muajsh, për borxhin publik të Shqipërisë janë interesuar edhe të huajt, të cilët vitin e shkuar blenë 14.4 mld lekë tituj me vlerë në vendin tonë. Shifra të mëvonshme nuk janë ende publike.
Ky fenomen u vërejt për herë të parë në vitin 2024 dhe u pa si zhvillim pozitiv nga Banka e Shqipërisë, por jo nga qeveria.
Kryetar i komisionit të Dezinformimit, Erion Braçe u shpreh i shqetësuar për interesin e të huajve, pasi aty mund të ketë edhe investitorë nga vende jo-mike. Ai i kërkoi Guvernatorit Gent Sejko origjinën e investitorëve.
Braçe vuri theksin se është e nevojshme ndërtimi me ligj një sistem kontrolli me qëllim që ekonomia e hapur të mos infektohet nga kapitale që e kanë origjinën e tyre nga vende jo mike. Sistemi bankar e financiar i këtij vendi duhet të jetë në alert të vazhdueshëm edhe për këtë
Sejko tha se nuk ka informacion për origjinën e blerësve të borxhit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
