.png)
Nga Gazeta ‘SI’ – Me 77 votat pro të mazhorancës, Kuvendi miratoi sot projektligjin e shumëdebatuar “Për barazinë gjinore”.
36 deputetë të opozitës votuan kundër.
Projektligji dominoi diskutimet e seancës maratonë, me demokratët që akuzuan socialistët se po i hapin rrugë deformimit të familjes tradicionale.
Drafti i Barazisë Gjinore dhe aktet e tjera të rendit të ditës kaluan në votim të menjëhershëm, pasi grupi parlamentar i Partisë Socialiste kërkoi ndërprerjen e diskutimeve dhe kalimin menjëherë në votim të projektligjeve në rendin e ditës.
PS kërkoi ndërprerjen e diskutimeve dhe kalimin e votimit pa debat pas deklaratave të ish-kryeministrit Sali Berisha ndaj ambasadorit të BE-së në Tiranë.
Me 77 vota të mazhorancës u miratua edhe raporti i Komisionit për Çështjet Ligjore dhe Administratën Publike për mosngritjen komisionit hetimor për shkarkimin e Presidentit të Republikës, Bajram Begaj. 32 deputetë të opozitës votuan kundër.
Parlamenti ka miratuar me 105 vota pro ngritjen e Komisionit të Posaçëm për Reformën Zgjedhore në seancën e sotme.
Në fund të seancës qeveria dhe opozita u dakordësuan për miratimin e dy komisioneve të posaçme parlamentare bipartizane që kanë të bëjnë me Reformën Zgjedhore dhe tjetra me atë Territoriale.
Të dyja votimet u miratuan me 105 vota pra nga të dyja kahet dhe një kundër, votë e Erald Kaprit të Partisë Mundësia.
Dy komisionet e shumëpërfolura pritet të ndryshojnë ndarjen territoriale në vend, sa i përket edhe numrit të bashkive.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
