.png)
Nga Gazeta ‘Si’- Partia Demokratike i është drejtuar Kuvendit me një shkresë ku kërkohet ngritja e një komisioni hetimor për Kontrollin e Ligjshmërisë në Administrimin e Fondeve të Programit IPARD II.
Kjo kërkesë vjen nga PD, pasi kreu i SPAK, Altin Dumani pranoi se çështja aktualisht është nën hetim së bashku me homologë evropianë.
Shkresa e depozituar në Kuvend është firmosur nga 45 deputetë të opozitës.
PD argumenton se kërkesa për ngritjen nga Kuvendi të një komisioni hetimor, i përmbush tri kriteret kushtetuese.
“Çështja ka të bëjë me funksionin ligjvënës dhe funksione të tjera për të cilat ai është i autorizuar të marrë masa ligjore; objekti i hetimit fokusohet në një çështje konkrete; dhe ekzistojnë të dhëna dhe indicie të mjaftueshme që dëshmojnë për ekzistencën e problematikave dhe dyshimeve të arsyeshme lidhur me ligjshmërinë e veprimeve dhe mosveprimeve të institucioneve dhe zyrtarëve shqiptar në administrimin e fondeve të programit IPARD II”, theksohet në shkresë.
Opozita shprehet se nga investigimet e kryera ka rezultuar se funksionarë publik, familjarë dhe lidhje shoqërore të tyre apo edhe eksponentë të krimit të organizuar kanë përfituar qindra mijëra euro nga fondet e programit IPARD II, duke përforcuar kështu gjetjet dhe konkluzionet e zyrtarëve evropianë.
Gjithashtu theksohet se nga hetimet e zyrtarëve evropianë të OLAF rezultuan shkelje shumë serioze gjatë fazës së dhënies së granteve, si edhe gjatë zbatimit të projekteve.
Në shkresë përmendet edhe fakti që kreu i SPAK, gatë raportimit në Komisionin e Ligjeve, “pranoi se aktualisht çështja është nën hetim, në bashkëpunim me prokurorët evropianë”.
PD ka kërkuar që Komisioni të përbëhet nga 11 anëtarë, nga të cilët kryetari dhe katër anëtarë i përkasin Grupit Parlamentar të PD dhe gjashtë anëtarë Grupit Parlamentar të PS.
Gjithashtu kërkohet që Komisioni të ushtrojë veprimtarinë për një afat 6-mujor nga data e miratimit të këtij vendimi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
