.png)
Nga Gazeta Si – Suedia provon të rilindë në kualifikueset e Botërorit – përballë Kosovës në Goteborg.
Nordikët ndodhen në fund të Gr. B, me vetëm një pikë nga tre ndeshje, ndërsa Dardanët janë në garë të plotë për një kualifikim historik.
Shpresat e Suedisë për të siguruar një biletë për Kampionatin Botëror 2026 në Amerikën e Veriut varen tashmë në një fije peri, pas fillimit zhgënjyes në grup.
Skuadra e Jon Dahl Tomasson e nisi me një barazim 2-2 në transfertë ndaj Sllovenisë, por më pas pësoi dy humbje radhazi – ndaj Kosovës dhe së fundmi ndaj Zvicrës.
Presioni mbi trajnerin danez është më i larti i viteve të fundit.
Gjatë humbjes ndaj Zvicrës, tifozët suedezë shpalosën pankarta të ashpra, njëra prej të cilave i kërkonte trajnerit të jepte dorëheqjen, ndërsa tjetra shkruante thjesht “Danish bastard”.
Sipas një ankete të gazetës më të mëdha sportive në Suedi, 90% e 40.000 lexuesve kërkuan shkarkimin e Tomassonit.
Suedia është kualifikuar vetëm një herë në 4 Kupat e fundit të Botës, dhe pavarësisht garancive të trajnerit se kualifikimi mbetet i mundur, tifozët nuk po nxitojnë të rezervojnë fluturimet drejt Amerikës së Veriut.
Në ndeshjen e sotme, vendasit kërkojnë hakmarrje për humbjen 2-0 që Kosova iu shkaktoi muajin e kaluar – një nga disfatat më befasuese në historinë e tyre moderne.
Në anën tjetër, Kosova ka dëshmuar se fitorja ndaj Suedisë nuk ishte rastësi. Dardanët e Franco Foda-s e pasuan atë sukses historik me një barazim inkurajues 0-0 ndaj Sllovenisë.
Në aspekt realist, ndjekja e Zvicrës, e cila ka fituar të treja ndeshjet pa pësuar gol, është pothuajse e pamundur.
Megjithatë, objektivi është i qartë: të mbeten përpara Sllovenisë dhe Suedisë, gjë që do t’u siguronte një vend në play-off për kualifikimin.
Duke menduar se Kosova renditej në vendin e 177-të në renditjen e FIFA-s vetëm tetë vite më parë, përfshirja e saj në garën për play-off është një hap gjigant përpara.
Skuadra është në një formë mbresëlënëse, me vetëm një humbje në tetë ndeshjet e fundit, duke fituar gjashtë prej tyre.
Për më tepër, Dardanët vijnë në Goteborg me dy ndeshje pa pësuar gol dhe një moral të lartë që mund të sjellë një tjetër surprizë.
- Formacionet e mundshme
Suedia: Johansson; Gudmundsson, Hien, Lagerbielke; Bardghji, Ayari, Karlstrom, Bergvall, Bernhardsson; Isak, Gyokeres
Kosova: Muric; Gallapeni, Aliti, Hajdari, Krasniqi; Rexhbecaj, Avdullahu, Vojvoda; Rrahmani, Muriqi, Muslija
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
