.png)
Nga Gazeta Si- Belgjika kërkon zgjidhje për burgjet e mbipopulluara – bisedime me Kosovën dhe Shqipërinë
Dy ministre belge, Ministrja e Drejtësisë Annelies Verlinden dhe Ministrja e Azilit dhe Migracionit Anneleen Van Bossuyt janë nisur për një mision diplomatik në Shqipëri dhe Kosovë.
Gazeta belge, “de Morgen” shkruan se për të lehtësuar mbipopullimin strukturor në burgjet belge, qeveria po shqyrton marrjen me qira ose ndërtimin e një burgu në një nga këto dy vende.
“Misioni përqendrohet në forcimin e bashkëpunimit në luftën kundër krimit të organizuar, rikuperimin e aseteve kriminale jashtë vendit, trajtimin e mbipopullimit në burgjet belge dhe migracionin”, shkruan de Morgen, ku ndër të tjera shton se monistret do të këmbëngulin që Shqipëria të ripranojë shqiptarët që mbahen në burgjet belge.
“Janë një total prej 307 shqiptarësh në burgjet tona, 253 prej të cilëve nuk kanë të drejtë qëndrimi”.
Gazeta belge shkruan se marrëveshja midis Shqipërisë dhe Holandës (e bërë në 2018 për bashkëpunim në fushën e sigurisë dhe drejtësisë) nuk është shfrytëzuar sa duhet dhe dy ministret duan ta ndryshojnë këtë në këtë ‘mision’.
“Nëse ata që janë dënuar këtu dhe që nuk kanë të drejtë qëndrimi, mund ta vuajnë dënimin e tyre në vendin e tyre të origjinës, atëherë kjo do të ishte një ekzekutim i saktë i dënimit ashtu edhe një rritje e konsiderueshme e efikasitetit për institucionet tona të burgjeve”, tha Ministrja Verlinden.
Gjatë misionit, do të diskutohet edhe një memorandum mirëkuptimi mbi ndarjen e aseteve, në mënyrë që asetet kriminale të konfiskuara në Shqipëri ose Kosovë bazuar në informacionin e hetimit gjyqësor belg të mund të kthehen pjesërisht në thesarin belg.
Ministrja Verlinden është pozitive për bashkëpunimin me Kosovën dhe Shqipërinë, shkruan ‘de Morgen’, ku shton se Kosova është një vend tranzit për trafikimin e qenieve njerëzore dhe armëve, dhe po shfaqet gjithnjë e më shumë në rastet belge si një vend për pastrim parash.
“Shqipëria është një partner strategjik në luftën kundër trafikimit të drogës, me një prani të fortë të organizatave kriminale shqiptare në portin e Antverpit. Ballkani Perëndimor është aktualisht një rajon thelbësor në luftën tonë kundër krimit të organizuar”, deklaroi Ministrja Verlinden.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
