.png)
Nga Gazeta Si – Liverpool ra dakort të shpenzojë 125 milionë paund ose 144.27 milionë euro për suedezin e Newcastle United, Alexander Isak.
Shifrës rekord për një lojtar në Premier League pritet ti shtohen edhe 5 milionë paund të tjerë ose 5.77 milionë euro në formë bonusesh.
Isak do ti nënshtrohet vizitave mjekësore përpara se të firmosë për 6 vitet e ardhshme në “Anfield Road”.
Merr fund në këtë mënyrë saga e transferimit të 25 vjeçarit që këmbënguli në largimin nga “St James Park” duke mos u stërvitur asnjë ditë me “qymyrxhinjtë” në sezonin e ri.
Për ta zëvëndësuar, Newcastle bleu pak ditë më parë, Nick Woltemade-n nga Stuttgart.
Liverpool kishte thyer rekordin e klubit, javë më parë kur firmosi me Florian Wirtz nga Leverkusen për 100 milionë paund ose 115.37 milionë euro, të cilave do t’ju shtohen në formën e bonuseve 16 milionë paund ose 18.46 milioën euro.
Blerja e Isak i shtohet atyre të Hugo Ekitike, Milos Kerkez, Jeremie Frimpong, Giorgi Mamardashvili, Armin Pecsi dhe Giovanni Leoni.
Liverpool mbërrin kështu në shifrën e 416.2 milionë paundëve të shpenzuar ose 480 milionë euro – totali më i lartë në historinë e Premier League.
Kjo është vetëm hera e dytë që një skuadër angleze thyen barrierën e 400 milionë paundëve ose 461.46 milionë eurove.
Pas Chelsea-t që shpenzoi 401.2 milionë paund ose 462.85 milionë euro në verën e vitit 2023.
Liverpool mund ta rrisë kufirin e shpenzimeve pasi “Reds-at” po punojnë për blerjen e mbrojtësit anglez, Marc Guehi nga Crystal Palace.
Ndërsa në dalje, Luis Diaz, Darwin Nunez, Jarell Quansah, Caoimhin Kelleher, Trent Alexander-Arnold, Tyler Morton dhe Ben Doak iu dhanë mundësi kampionëve në fuqi, të arkëtojnë 190 milionë paund ose 219.19 milionë euro.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
