Gazeta Si – Ish-zonja e parë e Koresë së Jugut, Kim Keon-hee, u arrestua pasi u akuzua zyrtarisht të enjten e kaluar, ndër të tjera, për korrupsion, manipulim të tregut dhe ndërhyrje në zgjedhje.
Prokurorët kishin kërkuar që ajo të mbahej në paraburgim. Një gjykatë e miratoi kërkesën të martën dhe lëshoi një urdhër arresti. Kim kishte qenë tashmë në paraburgim për disa orë, duke pritur vendimin e gjyqtarëve.
Kim është gruaja e ish-presidentit Yoon Suk-yeol, i cili është gjithashtu në burg dhe në gjyq për kryengritje, tradhti të lartë dhe abuzim me pushtetin pas përpjekjes për të vendosur ligj ushtarak në dhjetor 2024.
Kjo është hera e parë në historinë e Koresë së Jugut që një ish-president dhe zonja e parë janë arrestuar në të njëjtën kohë.
Akuzat që çuan në paraburgimin e Kim janë të ndara nga ato të Yoon, megjithëse hetime të tjera janë duke u zhvilluar për rolin e saj të mundshëm në përpjekjen për grusht shteti të burrit të saj.
Kim është akuzuar për 16 akuza, që mbulojnë një sërë çështjesh. Ndër të tjera, ajo akuzohet për pjesëmarrje në një skemë të paligjshme për të rritur vlerën e aksioneve të importuesit të makinave “Deutsch Motors” midis viteve 2010 dhe 2012; ndërhyrje në emërimin e kandidatëve për zgjedhjet e pjesshme parlamentare të vitit 2022 dhe zgjedhjet e përgjithshme të vitit 2024; dhe pranimin e dhuratave të shtrenjta nga Kisha e Unifikimit (një grup fetar që konsiderohet gjerësisht si kult) në këmbim të mbështetjes së aktiviteteve të grupit nga bashkëshorti i saj, Yoon Suk-yeol.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
