Franca do ta njohë zyrtarisht shtetin palestinez në shtator, ka thënë presidenti francez, Emmanuel Macron.
Kështu, Franca do të bëhet shteti i parë anëtar në grupin e shtatë vendeve më të industrializuara (G7) që merr këtë hap.
Përmes një postimi në X, Macron ka thënë se njoftimi zyrtar do të bëhet në takimin e përvitshëm të Asamblesë së Përgjithshme të Kombeve të Bashkuara në Nju Jork.
Pas lajmit, ka reaguar kryeministri izraelit Benjamin Netanyahu i cili dënoi menjëherë vendimin francez, i cili, shkroi në një deklaratë, se “shpërblen terrorin”.
“Një shtet palestinez në këto kushte do të ishte një trampolinë për shfarosjen e Izraelit, jo për të jetuar në paqe pranë tij”, komentoi Netanyahu.
Edhe Shtetet e Bashkuara kanë kundërshtuar planin e presidentit francez për të njohur një shtet palestinez. Qëndrimi u bë me dije nga Sekretari i Shtetit i SHBA-së, Marco Rubio, i cili u shpreh se vendimi është i pamatur dhe i shërben vetëm propagandës së Hamasit.
“Shtetet e Bashkuara e kundërshtojnë me forcë planin e Emmnuel Macron për të njohur një shtet palestinez në Asamblenë e Përgjithshme të OKB-së. Ky vendim i pamatur i shërben vetëm propagandës së Hamasit dhe pengon paqen. Është një shuplakë në fytyrë për viktimat e 7 tetorit.”, shkroi Rubio.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
