.png)
Nga Gazeta Si- Shqipëria po i largohet epidemisë së gripit që mbërtheu vendin prej muajit nëntor.
Siç shkruan Instituti i Shëndetit Publik, në raportin më të fundit të survejancës, për Gazetasi.al, piku i rasteve me grip e viroza u shënua në fund të muajit janar dhe në fillim të muajit shkurt, (java e parë).
Por, ISHP thotë se deri javën e shkuar janë regjistruar rreth 15 mijë raste në mbarë vendin çka do të thotë se viruset janë akoma në qarkullim dhe mbrojtja e kujdesi prej tyre duhet të vazhdojë.
“Në vend qarkullojnë viruset e gripit të tipit A dhe B, Covid-19 dhe virusi RSV, megjithatë në nivel shumë më të ulët sesa gripi. Aktualisht, trendi i qarkullimit të gripit është në rënie dhe pritet të vazhdojë deri në fund të marsit”, thotë Instituti i Shëndetit Publik.
Trendi i Infeksioneve Respiratore
Sipas ISHP, numri i infeksioneve respiratore të sipërme dhe të poshtme është në rënie, aktualisht 15 mijë raste.
Shtrimet në spital kanë pësuar një ulje të theksuar si tek fëmijët (0-14 vjeç) ashtu edhe tek të rriturit.
Organizata Botërore e Shëndetësisë (OBSH) ka përcaktuar sezonin zyrtar të gripit nga fillimi i tetorit deri në mesin e majit.
Bazuar në përvojën shumëvjeçare në vendin tonë, qarkullimi i gripit fillon në muajt nëntor-dhjetor, arrin pikun në fund të janarit dhe fillim të shkurtit, dhe më pas fillon të ulet deri në fund të marsit.
ISHP thotë se, situata aktuale epidemiologjike është normale dhe e pritshme për këtë periudhë të vitit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
