Mutacioni i gripit të shpendëve ngre alarmin për rrezikun e transmetimit tek njerëzit në Evropë

Një raport i ri zbuloi 34 mutacione të mundshme gjenetike që mund të rrisin mundësinë e transmetimit të gripit të shpendëve nga kafshët te njerëzit.

Dy rregullatorë evropianë thanë se po gjurmonin variantet e virusit të gripit të shpendëve për shkak të kërcënimit të patogjenit që përshtatet për t’u përhapur midis njerëzve dhe për të shkaktuar pandemi të ardhshme.

Qendra Evropiane për Parandalimin dhe Kontrollin e Sëmundjeve (ECDC) dhe Autoriteti Evropian i Sigurisë Ushqimore lëshuan gjithashtu rekomandime që bazohen në analizat gjenetike dhe studimet e rasteve njerëzore për të përshkruar rreziqet aktuale nga virusi.

Gripi i shpendëve ka vrarë qindra miliona zogj anembanë globit vitet e fundit dhe është përhapur gjithnjë e më shumë te gjitarët, duke ngritur shqetësime se mund të çojë në transmetimin nga njeriu te njeriu.

Në fillim të kësaj jave, Shtetet e Bashkuara raportuan shpërthimin e parë të gripit të shpendëve H5N9 në shpendët në një fermë rosash në Kaliforni. Lloji që ka shkaktuar më shumë dëme vitet e fundit ka qenë H5N1. H5N9 është më i rrallë.

ECDC tha se ekspertët e saj identifikuan 34 mutacione gjenetike që mund të rrisin mundësinë e përhapjes së viruseve të gripit të shpendëve te njerëzit.

Agjencitë thanë se laboratorët e kafshëve dhe shëndetit publik mund t’i referohen listës së mutacioneve, e cila duhet të përditësohet vazhdimisht, për të monitoruar shfaqjen e shtameve që mund të transmetohen te njerëzit.

Mutacionet gjenetike, ose përzierja e materialit gjenetik midis viruseve, si dhe aktivitetet njerëzore si urbanizimi, përforcojnë rrezikun e transmetimit të virusit nga kafshët te njerëzit, thanë agjencitë evropiane.

Autoritetet e shëndetit dhe sigurisë ushqimore rekomandojnë monitorimin e kafshëve dhe njerëzve që mund të infektohen, së bashku me vaksinimin e shpendëve dhe rritjen e ndërgjegjësimit për të kontrolluar shpërthimin.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.