.png)
Departamenti i Shëndetit Publik të San Franciskos (SFDPH) ka njoftuar se një fëmijë është prekur nga gripi i shpendëve H5N1, duke shfaqur ethe dhe probleme me vetëdijen.
Në deklaratën e saj, SFDPH tha se fëmija nuk ishte shtruar në spital dhe është shëruar. Fëmija fillimisht u testua për Covid-19, virusin sincicial të frymëmarrjes (RSV) dhe grip. Pas testimit pozitiv për gripin A, testimi i mëtejshëm zbuloi se ai ishte prekur nga H5N1.
Deri më tani, hetimi nuk ka përcaktuar se si pacienti ishte ekspozuar ndaj virusit. Grant Colfax, drejtori i SFDPH u bëri thirrje të gjithë banorëve të San Franciskos që të shmangin kontaktin e drejtpërdrejtë me zogjtë e sëmurë ose të ngordhur, veçanërisht zogjtë e egër dhe shpendët. “Gjithashtu, ju lutemi shmangni produktet e qumështit të papasterizuar”, tha ai.
Zyrtarët thanë se rreziku për publikun mbetet i ulët, pa asnjë shenjë të transmetimit nga njeriu te njeriu por gjithsesi duhet kujdes.
Nëse konfirmohet nga Qendrat e SHBA për Kontrollin dhe Parandalimin e Sëmundjeve (CDC), rasti do të shënonte rastin e 67-të të vendit që nga fillimi i vitit 2024. Gjithashtu, rasti do të shënonte rastin e 38-të të Kalifornisë dhe i dyti i lidhur me një burim të panjohur ekspozimi. Rasti i parë i Kalifornisë nga një burim i pacaktuar përfshinte gjithashtu një fëmijë.
Virusi tani është zbuluar në të 50 shtetet e SHBA-së.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
