.png)
Rezultatet e dobëta janë të pafalshme dhe për këtë arsye trajnerët janë gjithnjë me valixhe në dorë. Kjo mund të shpjegojë pse shpesh trajnerë elitarë qëndrojnë në listën e pritjes për një skuadër. Muajt e shkuar pamë Anglinë dhe Manchester United të vendosin nën kontratë Thomas Tuchel dhe Ruben Amorim respektivisht. Gjatë këtyre ditëve Sean Dyche u largua nga Everton dhe Julen Lopetegui u shkarkua nga West Ham United. Në vend të tyre Graham Potter u emërua te West Ham dhe David Moyes kthehet te Everton.
Në vazhdim do t’ju njohim me 10 trajnerët më të mirë që aktualisht janë pa punë:
10. Paulo Fonseca
Portugezi nuk kaloi javët më të mira tek Milan por është ende një trajner të cilit mund t’i besohet. Paulo Fonseca nuk u përshtat me presionin specifik tek Milan, por sapo u raportua se nuk është në detyrë, ofertat nga Premier League nuk munguan.
9. Sean Dyche
Vendosi të largohej nga Everton duke besuar se kishte dhënë gjithçka për skuadrën e cila pa Dyche mund të ishte në Championship aktualisht. Sigurisht që duhet vlerësuar edhe Jordan Pickford por nën drejtimin e Dyche mbrojtja e Everton ishte pika më e fortë.
8. Joachim Löw
Gjermani mund të ishte më lart në këtë klasifikim por sukseset e tij më të mëdha janë regjistruar në nivel kombëtaresh krahasuar me ato të klubeve. I papunë prej fundit të “Euro 2021”, Joachim Löw në nivel klubesh ka fituar titullin në sezonin 2001/02 të kampionatit austriak me Tirol Innsbruck dhe më herët Kupën e Gjermanisë në vitin 1997 me Stuttgart.
7. Ole Gunnar Solskjaer
Periudha e tij te Man United ishte e çuditshme megjithëse ish-sulmuesi qëndroi në krye të skuadrës për pothuajse 3 vite. Ai fitoi 54.17% të ndeshjeve dhe arriti në Finalen e UEFA Europa League në vitin 2021. Megjithatë Solskjaer asnjëherë nuk u duk se ishte njeriu i duhur në vendin e duhur.
6. Erik ten Hag
Një tjetër trajner që ndoshta ishte njeriu i duhur por këtë herë në kohën e gabuar në drejtim të Man United. Erik ten Hag fitoi dy trofe, një për çdo sezon por tani i duhet të presë për një skuadër të re. Ajo që arriti te Ajaks në kampionatin holandez, sigurisht që nuk do të mbetet në heshtje, sidomos dy edicionet që e dërgoi skuadrën deri në gjysmëfinalet e Champions League.
5. Edin Terzić
Pas largimit të Paulo Fonsecas nga Milan pati zëra për ish-trajnerin e Dortmund, Edin Terzic se mund ta pasonte portugezin në San Siro. Edhe nga Premier League ka interes për takticienin gjermano-kroat që udhëhoqi verdhezinjtë në një finale të papritur në Champions League.
4. Massimiliano Allegri
Juventus përfundoi aventurën e dytë të Massimiliano Allegrit në klub pas sjelljes së tij Finalen e Kupës së Italisë në vitin 2024. Ai e udhëhoqi skuadrën nga viti 2014 në vitin 2019 duke fituar 5 herë Serie A, 4 herë Kupën dhe luajti dy finale në Champions League. Ndërsa në aventurën e dytë fitoi vetëm Kupën e Italisë.
3. Xavi
Katalanasi nuk ka një kohë të gjatë në trajnim, detyrë të cilën e nisi në Katar te Al-Sadd, në përfundim të karrierës si lojtar. U kthye te Barcelona në nëntor të vitit 2021 ku gjeti një skuadër pa identitet. Puna e tij dha rezultat në sezonin e dytë ku Xavi i udhëhoqi “blaugranat” drejt titullit. Problemet brenda dhe jashtë fushës e ndoqën në sezonin e tretë, në përfundim të të cilit Barcelona e shkarkoi.
2. Jurgen Klopp
Gjermani u largua nga Liverpool dhe futbolli i përditshëm për shkak të humbjeve të energjisë dhe lajmëroi se do të bëjë një vit pushim. Por mesa duket jo plotësisht. Aktualisht është drejtori i futbollit në grupin Red Bull ku përcakton dhe ndjek strategjinë e zhvillimit të lojtarëve të rinj dhe merkatos. Gjermania e kërkon t’i besojë Kombëtaren, por edhe klubet e mëdha nuk mbeten pas për shërbimet e tij.
1. Zinedine Zidane
Francezi nuk do të harrohet asnjëherë, jo vetëm për atë që bëri brenda fushës, por edhe anash saj. Fitoi dy herë titullin në La Liga dhe 3 sezone radhazi në Champions League në krye të Real Madrid. Pa harruar Superkupat dhe Kupën e Botës për klube. U largua nga “Bernabeu” në vitin 2021 por është thjesht çështje kohe përpara se ta shohim sërish në detyrë. Jo vetëm në klub por edhe në përfaqësuese.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
