.png)
Gazeta Si – Dy persona janë arrestuar gjatë një operacioni antidrogë në Tiranë, ku gjatë aksionit u janë sekuestruar 1 kg e 50 gramë kokainë, me vlerë 270 mijë euro nëse do të shitej në treg.
Njëri prej tyre është Klajdi Serjani, 24 vjeç, i cili rezulton të jetë nipi i Pajtim Serjanit, një personazh i njohur për blutë e Tiranës i dënuar më parë për gjobëvënie, i cili i ka shpëtuar një atentati në 2015, ndërsa njihet edhe si miku i Emiljano Shullazit.
Ndërsa i arrestuari tjetër është Euxhenjo Manushi, 20 vjeç, djali i një muzikanti të muzikës tallava. Operacioni policor u kodua “Fam Fanz” për shkak të mbishkrimeve të njëjta mbi pakon me drogë, vlera e së cilës nëse hidhej në treg arrinte në 270 mijë euro.
“Finalizohet nga Sektori për Hetimin e Narkotikëve operacioni policor i koduar “Fam Fanz”, i ndjekur me metoda proaktive. Gjatë operacionit goditet një tjetër rast i shpërndarjes së drogave të forta në qytetin e Tiranës. Sekuestrohen 1 kg e 50 gramë lëndë e dyshuar narkotike kokainë (me vlerë tregu rreth 270 000 euro). Policia ka kapur në flagrancë 2 shtetasit që ushtronin këtë veprimtari kriminale. Vijon intensivisht puna për identifikimin dhe kapjen e personave të tjerë të përfshirë në këtë aktivitet kriminal”, – njofton policia.
Të rinjtë janë lokalizuar në rrugën “Kastriotët”, në automjetin me drejtues shtetasin Klajdi Serjani dhe pasagjer shtetasin Manushi.
Gjatë kontrollit fizik të shtetasit Klajdi Serjani, shërbimet e policisë i gjetën 1 kg e 50 gramë lëndë të dyshuar narkotike kokainë.
Lënda narkotike, së bashku me një shumë parash dhe celularët e shtetasve të arrestuar, u sekuestruan në cilësinë e provës materiale.
Burime paraprake, bëjnë me dije se Klajdi Serjani, është nipi i Pajtim Serjanit, një prej personazheve të njohur të botës së krimit në kryeqytet, miku i Emiljano Shullazit, teksa në vitin 2015 i ka shpëtuar edhe një atentati me armë zjarri në “rrugën e Kavajës” në një lokal.
Ai është arrestuar dhe dënuar për gjobëvënie me tre vite, ndërsa aktualisht është i lirë, pasi e ka përfunduar dënimin.
Serjani u dënua për gjobëvënie ndaj një biznesmeni në vitin 2014. Në vitin 2015, Serjanit i është bërë atentat të “Rruga e Kavajës”, ndërsa lidhur me këtë ngjarje asokohe u arrestuan Aurel dhe Amarildo Hoxhallari.
Serjani njihet si miku i Emiljano Shullazi, i dënuar dhe prej vitesh në burg për grup të strukturuar kriminal.
Në shtator 2017, policia i sekuestroi Serjanit katër makina të blinduara më vlerë 1 milion euro. Tre prej makinave rezultuan të trafikuara nga vendet e BE, njëra prej të cilave me targa të falsifikuara.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
