.png)
Gazeta Si - Ish-kryekomunari i Shëngjinit, Salvador Kaçaj dhe ish-deputeti i PS, Armando Prenga, janë thirrur sot në SPAK si persona që kanë pasur dijeni në lidhje me protestën e 21 janarit 2011, ku mbetën të vrarë 4 protestues para kryeministrisë.
Kaçaj, pas daljes u shpreh shkurtimisht: “Isha thirrur për 21 Janarin si person që ka dijeni. Kam qenë protestues”.
Pas 40 minutave dëshmi, të njëjtën gjë tha dhe ish-deputeti socialist: “Jam thirrur për 21 janarin, si person që kam dijeni, dhashë shpjegime si protestues”, tha Prenga.
Në javët e fundit, në SPAK janë thirrur disa prej ish-funksionarëve të kohës dhe ish-deputetë socialist, Saimir Tahiri ish-deputeti Arben Çudo apo dhe deputeti aktual i PS, Xhemal Qefalia.
Po ashtu, kanë dëshmuar edhe ish-kreu i Policisë së Shtetit, Hysni Burgaj, ish-zëvendësi i tij, Agron Kuliçaj apo dhe ish-kreu i Gardës së Republikës, Ndrea Prendi.
SPAK ka nisur veprimet hetimore në lidhje me këtë çështje pasi Gjykata e Lartë i vendosi kompetencën. Një nga detyrat që i ka lënë gjykata është të pyesë të gjithë organizatorët e kësaj proteste si dhe gjithë zyrtarët që kanë pasur detyrë menaxhimin e protestës. Në protestën e 21 Janarit 2011 u vranë nga Garda e Republikës 4 protestues opozitarë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
