.png)
Nga Gazeta Si- Pas sfidës Laçi- Partizani (1-1), në mbrëmje u mbyll java e pestë e Abissnet Superiores. Në Elbasan Arena, Dinamo City e Ilir Dajës u përball me Skënderbeun, ndërsa në Air Albania, bardheblutë e Tiranës u ndeshën AF Elbasani.
Kështu, në Elbasan Arena, blutë e Dinamo Cityt kanë regjistruar fitoren e parë, nën drejtimin e “djalit të shtëpisë”, Ilir Daja, teksa ka mundur 2-1 Skënderbeun, me golat e Zabërgja (6’) dhe në kohën e shtuar nga Itodo (90’+1), ndërsa për miqtë golin e “nderit” e shënoi Rashica (54’) nga pika e penalltisë.
E luftuar ishte përballja në Air Albania, mes Tiranës dhe Elbasanit, që u mbyll në barazim me shifrat 1-1. Fatet e sfidës u përcaktuan që në pjesën e parë, me golat që u realizuan nga Edison Kola (23’) dhe Ze Gomes (25’).
Fund i takimit ishte dramatik, për Elbasanin akordohet një penallti, por Emiliano Musta humbet 11-metërshin, pasi goditja e tij ndalet nga portieri Gentian Selmani.
Falë këtyre rezultateve, Elbasani ngjitet në vendin e tretë, me 8 pikë, Dinamo në vendin e pestë, me 7 pikë, ndërsa Tirana dhe Skënderbeu zënë vendet shtatë dhe nëntë, me nga 5 e 4 pikë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
