Gazeta Si – Një tjetër automjet ka përfunduar në ujërat e Kanalit të Butrintit, duke shënuar rastin e dytë brenda 8 ditësh.
Ngjarja ka ndodhur në orët e para të mëngjesit. Drejtuesi i mjetit ka humbur kontrollin dhe ka përfunduar në Kanalin e Butrintit në afërsi të fshatit Vrinë.
Nga burime paraprake bëhet me dije se kanë qenë dy persona brenda në mjet, të cilët kanë mundur të dalin me not pa dëmtime. Policia e Sarandës ka shkuar në vendin e ngjarjes ku ka nisur hetimet.
Sipas policisë mjeti që ka rënë në kanal, ka qenë tip “Fiat” me targa AA 459 RL me drejtues shtetasin e huaj Patryk Sajnog. Gjithashtu ai rezulton pa leje drejtimi dhe është arrestuar nga policia.
Disa orë më pas automjeti është nxjerrë me vinç nga uji. Në 31 korrik, një tjetër automjet ra në të njëjtin vend, duke shkaktuar plagosjen e dy turistëve të huaj të cilët vinin nga Qafë-Bota.
Burime pranë Komisariatit të Policisë Sarandë, bëjnë me dije se ky vend është rrezik konstant për aksidente dhe jo rrallë automjetet përfundojnë në kanal, pasi nuk ekziston asnjë sinjalistikë dhe barrierë që të paralajmërojë drejtuesit e mjeteve se aty është kthesë e fortë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
