Nga Gazeta ‘SI’ – Shoqata e Bashkive të Opozitës në Shqipëri janë të shqetësuar për ndryshimet në ligjet e planifikimit të territorit, që i japin më shumë kompetenca qeverisë.
Në një letër drejtuar Këshillit të Europës, Shoqata thotë se qeveria shqiptare ka zaptuar një seri kompetencash të pushtetit vendor në dhënien e Lejeve për Ndërtim dhe se është cënuar pavarësia e pushtetit vendor.
Shoqata thotë se aktiviteti i Bashkive është vendosur në kontroll të plotë nga qeveria qendrore.
“Për fat të keq, në këtë dekadë, politika qeveritare rezulton të jetë një proces diabolik i një transformimi ligjor të paramenduar, me të cilin Kryeministri Rama ka sulmuar autonominë vendore, kufijtë dhe zhvillimin demokratik, shoqëror e ekonomik të rajoneve dhe interesat e qytetarëve”, thuhet në letrën drejtuar KE-së.
Specifikisht, Shoqata trego se bëhet fjalë për ndryshimet në ligjet: “Për Vetëqeverisjen Vendore”, “Për ndarjen administrativo-territoriale të njësive të qeverisjes vendore në Republikën e Shqipërisë”, “ Për Bashkëqeverisjen“, “Për zhvillimin rajonal dhe kohezionin”, “ Për planifikimin e dhe zhvillimin e territorit”, “Për Turizmin”, “Investimet strategjike”, Ligji për zonat e mbrojtura, “Për realizimin e procedurës së ndërtimit të Teatrit Kombëtar”, “Për koncesionet dhe partneritetin publik privat..”, etj.
“Rritja me kokëfortësi e autoritarizmit te Kryeministrit Rama po ngushton jo vetëm hapësirat e qeverisjes vendore, por po e shndërron vendin në një republikë autokratike, në shërbim të interesave të një grupi okult me interesa të dyshimta”, thuhet në letër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
