Kreu i grupit parlamentar të Partisë Demokratike, Gazment Bardhi ka deklaruar se, kryeministri Edi Rama, në mungesë transparence, sipas tij, ka emëruar si këshilltar të jashtëm ish-kreun e shërbimit sekret të Rumanisë, Florian Coldea.
Sipas Bardhit, ish-agjenti rumun është nën hetim për korrupsion dhe dyshohet se është drejtuesi i një linje të trafikut ndërkombëtar të kokainës.
“Edi Rama pa asnjë transparencë ka emëruar si këshilltar të jashtëm Florian Coldea, ish drejtor i Shërbimit Sekret Rumun. Ish agjenti sekret rumun është nën hetim për korrupsion, si dhe është referuar si drejtuesi i një linje trafiku ndërkombëtar të kokainës, që transportohej nga Meksika në Shqipëri dhe më pas nga Shqipëria në Rumani.
![](https://gazetasi.al/wp-content/uploads/2024/06/kerkesa-e-Bardhit-per-keshilltarin-e-Rames-425x550.jpg)
![](https://gazetasi.al/wp-content/uploads/2024/06/kerksa-dy-Bardhi-506x550.jpg)
Në emër të Grupit Parlamentar të Partisë Demokratike, kam kërkuar zyrtarisht një interpelancë urgjente me Kryeministrin Edi Rama, i cili duhet të bëjë transparencë për Kuvendin dhe qytetarët shqiptar: (1) Si është njohur me këshilltarin e tij të jashtëm Coldea dhe a ka cenuar kjo sigurinë kombëtare për shkak të funksionit të tij si punonjës i shërbimeve të huaja sekrete; dhe (2) Cili ka qenë roli i z. Coldea dhe çfarë veprimtarie këshillimi konkretisht ka kryer ai për Kryeministrin e Shqipërisë dhe për të cilën është paguar më taksat e shqiptarëve, ndërkohë që udhëhiqte një linjë të trafikut ndërkombëtar të kokainës nga Shqipëria në Rumani”, thotë Bardhi përmes një postimi në Facebook
Referuar kerkesës për interpelancë, Bardhi i referohet mediave rumune te cilat kane shkruar se ish-agjenti rumun paguhej si këshilltar i jashtëm i kryeministrit me pagë 7 mijë euro në muaj.
“...Grupi Parlamentar i Partisë Demokratike do të kërkojë edhe zyrtarisht nga SPAK të hetojë rolin e Këshilltarit të Jashtëm të Edi Ramës në Shqipëri dhe sesi ka ndikuar marrëdhënia e tij me Edi Ramën për realizimin e veprimtarive të dyshuara kriminale të trafikut ndërkombëtar të kokainës nga Meksika në Shqipëri dhe nga Shqipëria në Rumani”, shkruan Bardhi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.