Gazeta Si- Pjetër Paçani, 61-vjeçari nga Fushë-Kuqja e Laçit që u arrestua mbrëmjen e të martës në Fier, ishte një nga 50 personat më të kërkuar në Shqipëri dhe prej 13 vitesh ishte në arrati.
I qetë, i veshur me të bardha dhe me mjekër, është ky momenti kur vrasësi i dy personave në vitin 2011 del me pranga në duar nga banesa. Në video dallohet edhe ndryshimi i tij ndër vite, tashmë me mjekër dhe i thinjur.
Në një njoftim për mediat, policia tha se ai u kap në një banesë në Fier në lagjen “1 Maji” nga Forcat Operacionale.
Në banesë iu gjetën 3 armë zjarri pistoleta (1 Glock, 1 Zastava dhe 1 TT), 1 armë zjarri automatik, municion luftarak, granatëhedhës dhe 2 antiplumba.
Gjykata e Tiranës e ka dënuar në vitin 2014 me 25 vjet burg për vrasjen e 2 personave pranë një karburanti në aksin Lezhë-Tiranë më 18 Janar 2011.
Ngjarja për të cilën akuzohet ndodhi më datën 18 janar 2011, pranë një karburanti në autostradën Lezhë-Tiranë. Pjetër Paçani, i cili ishte biznesmen i një kompanie betoni, ekzekutoi me armë zjarri Ndoc Zymajn dhe Vlash Gjeçin.
Shkak për krimin dyshohet se u bë një kontratë huamarrje mbi 100 mijë euro, e cila nuk është kthyer sipas kohës së parashikuar në kontratë.
Palët fillimisht u konfliktuan nëpërmjet mesazheve telefonike dhe bisedave, duke ofenduar njëri-tjetrin. Pas kësaj situata përshkallëzoi.
Ditën e krimit, Pjetër Paçani mori pistoletën dhe shkoi në lokalin ku Vlash Gjeçi dhe Ndoc Zymaj po pinin kafe.
Sipas dosjes hetimore, Paçani hyri në lokal, nxori armën dhe u tha “…mos lëvizni…”. Hapi zjarr disa herë në drejtim të tyre dhe më pas shtoi “…më shani prap me nënë e motër…”.
Më pas doli nga lokali, hipi në makinën e tij Porsche dhe u largua duke i shpëtuar arrestimit për vite me radhë. Njëri prej viktimave, Vlash Gjeçi, i cili ishte ende gjallë sipas dëshmitarëve tha, “…na preu në besë…”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.