.png)
Nga Marcus Alves* – Pas një darke me presidentin e Federatës Shqiptare të Futbollit në Milano, ish-mbrojtësi i Arsenalit, Barcelonës dhe Manchester Cityt, Sylvinho ra dakord që të merrte në dorë kombëtaren e Shqipërisë.
Në fillim të vitit 2023, ai mbërriti në zyrën e tij në Tiranë me ndihmës ish-mbrojtësin e City dhe West Ham, Pablo Zabaleta dhe ish-mesfushorin e Middlesbrough, Doriva.
Në total, ata panë 240 klipe ndeshjesh për të arritur në një listë fillestare prej 70 futbollistësh, më pas duke e shkurtuar atë në 39 dhe më në fund në 23 për ndeshjen e tyre hapëse me Poloninë në kualifikueset e “Euro 2024”.
Mes tyre ishte edhe anësori i atëhershëm i Wycombe, Anis Mehmeti.
Ai nuk ishte paraqitur kurrë për kombëtaren shqiptare deri në atë moment, por u thirr si pjesë e procesit të rindërtimit që Sylvinho filloi që nga dita e parë.
“Zaba (Zabaleta) ka luajtur për një kohë të gjatë në Angli, kështu që ai ende ka kontaktet e tij atje dhe na solli disa informacione për Mehmetin,” tha Sylvinho për BBC Sport, duke shtuar se kur filluan ta shohin si mundësi, ai kaloi nga League One tek Bristol City në Championship dhe kjo i bëri të mendojnë se “potencialin që po shohim ne, e shohin dhe të tjerët kështu që ky djalë ka potencial”.
Sylvinho thotë se e dinte që në fillim se ka shumë shqiptarë si ai që luajnë jashtë vendit dhe duhej të vëzhgoheshin të gjithë.
Ajo punë e palodhur dha rezultat.
Pavarësisht se humbi ndeshjen e parë 1-0 kundër Polonisë, Shqipëria qëndroi e pamposhtur deri në fund të sezonit të saj, duke përfunduar në krye të grupit dhe duke siguruar kualifikimin në Euro me një ndeshje para.
Një arritje e tillë i dha Sylvinhos statusin e heroit kombëtar.
Do të jetë vetëm hera e dytë në historinë e tyre që ‘Shqiponjat’ do të jenë në Euro, pasi debutuan në vitin 2016.
“Unë jetoj në një hotel që është rreth 2 km nga ndërtesa e FA, kështu që ndonjëherë kthehem në shtëpi përmes një parku të bukur dhe takoj tifozët. Zakonisht vijnë tek unë dhe më thonë “respekt, zotëri”, tha për BBC me buzëqeshje trajneri 50-vjeçar.
Nuk do të jetë më e lehtë në Gjermani, pas një barazimi që vendosi shqiptarët përkrah kampionëve në fuqi, Italisë, Kroacisë dhe Spanjës.
“Ne nuk do të shkojmë atje për t’u argëtuar gjithsesi,” tha Sylvinho. “Puna jonë nuk ka përfunduar dhe, nëse kemi ndonjë shans për të avancuar në fazën eliminatore, do të luftojmë për të në të njëjtën mënyrë që bëmë në kualifikuese”.
Gjetja e anësorit të përsosur në ligën e Koresë së Jugut
Pasi ka punuar më parë si asistent i kombëtares braziliane, midis korrikut 2016 dhe prillit 2019, Sylvinho nuk është i huaj për futbollin ndërkombëtar.
Megjithatë, kjo ka qenë një përvojë krejtësisht e ndryshme.
Një nga vendimet e tij të para në krye të Shqipërisë ishte heqja e formacionit 3-5-2 të miratuar nga paraardhësit e tij dhe kalimi në 4-3-3.
Kishte vetëm një çështje me të cilën ai nuk ishte mësuar në vendin e tij: ai kishte nevojë për një krah të djathtë me këmbën e majtë për ta bërë formacionin të funksiononte, por thjesht nuk e kishte.
Kështu ai dhe stafi i tij u zhytën në bazën e të dhënave të federatës për të kërkuar një lojtar me këto karakteristika, duke dalë me dy emra ku njëri prej tyre është 29-vjeçari Jasir Asani, i cili luan në Korenë e Jugut.
“Ne po shikonim video nga loja e tij në futbollin hungarez dhe mendoja, ‘kush është ky?’. Pra, për disa të shtuna, na u desh të vinim në zyrë në orën 9 të mëngjesit për të parë ndeshjet e tij për shkak të diferencës kohore.”
Në fund, gjithçka ia vlejti.
Asani ishte i duhuri. Lojtari i lindur në Maqedoninë e Veriut bëri një debutim të madh dhe i përfundoi kualifikueset me tre gola dhe dy asistime në emër të tij.
“Ai di të godasë topin nga distanca”, thotë Sylvinho për të.
Sylvinho beson fort se asgjë nga këto nuk do të ishte e mundur nëse ai nuk do të kishte vendosur të linte familjen e tij në Porto dhe të transferohej në një dhomë hoteli në Tiranë.
“Ata më kanë thënë se e kuptuan se kjo do të funksiononte në momentin që unë njoftova se do të doja të jetoja këtu. Më kanë lejuar të kuptoj plotësisht identitetin vendas dhe të jem 100% i përqendruar te puna”, tha trajneri.
Stili i tij sulmues agresiv ka impresionuar edhe tifozët dhe ekspertët më skeptikë, të cilët fillimisht nuk ishin të bindur nga qëndrimet e tij të mëparshme në krye të Lyon dhe Corinthians.
“Ata dinë ta godasin topin nga distanca, kanë stil dhe e duan këtë, kështu që unë i inkurajoj ta bëjnë”, tha Sylvinho.
“Nëse mendoni se kjo është gjëja më e mirë për të bërë, ju lutemi gjuani në portë!”, përfundoi Sylvinho për BBC, duke thënë këshillën që u jep lojtarëve.
*BBC
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
