.png)
Sekretari i Jashtëm britanik, David Cameron pritet të vizitojë Tiranën javën e ardhmshme.
“The Sun” shkruan se zyrtari i lartë britanik do të zhvillojë një vizitë zyrtare ku do të takojë krerët e institucioneve kryesore Shqiptare si Presidentin e Republikë, Bajram Begaj apo Kryeministrin Edi Rama.
Mediat britanike shkruajnë se në agjendën e Cameron janë parashikuar bisedime në kuadër të një bashkëpunimi të ri ndërmjet dy vendeve sa i përket luftimit të emigracionit të paligjshëm, një çështje kjo që vijojnë të përbëjë shqetësim për autoritetet e Mbretërisë së Bashkuar.
Për këtë çështje, Britania ka miratuar edhe planin “Ruanda” ku emigrantët e paligjshëm do të transferohen në shtetit Afrikan.
Edhe Ambasada e Britanisë së Madhe në Tiranë ka publikuar detaje nga vizita e sekretarit të Jashtëm britanik, David Cameron.
Ambasada bën me dije se “si pjesë e lidershipit në rritje të Mbretërisë së Bashkuar për të gjetur zgjidhje për sfidën pan-evropiane, Sekretari i Jashtëm britanik do të udhëtojë në Shqipëri këtë javë për t’u takuar me Presidentin, Kryeministrin dhe Ministrin e Jashtëm shqiptar për të diskutuar mbi bashkëpunimin Shqipëri-Britani e Madhe, për kontrollin e emigracionit të paligjshëm në vijën e parë të frontit”.
Njoftohet se “Sekretari i Jashtëm britanik do të nënvizojë suksesin e partneritetit tonë inovativ për t’i bërë ballë trafikantëve të qenieve njerëzore dhe emigracionit të paligjshëm si dhe ndikimin e investimeve britanike në parandalimin e emigracionit”.
“Sekretari i Jashtëm do të mbështetet në lidershipin e Mbretërisë së Bashkuar në trajtimin e krimit të organizuar duke njoftuar një program të ri që lidhet me gjyqësorin, për të trajtuar korrupsionin dhe krimin e organizuar në Shqipëri, si dhe ofrimin e ekspertizës së Mbretërisë së Bashkuar për Policinë Shqiptare, për axhendën e tyre të reformës”, njofton ambasada britanike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
