Europa është kontinenti që po pëson ngrohjen më të shpejtë dhe temperaturat po rriten pothuajse sa dyfishi i mesatares globale. Në një raport të dy organizatave botërore të monitorimit të klimës, Organizata Meteorologjike e OKB-së dhe Agjencia e Klimës së Bashkimit Europian, thuhet se kjo ka sjellë edhe një rritje prej30 për qind të vdekshmërisë.
“Shkalla e vdekjeve nga moti i nxehtë është rritur me 30% në Europë në dy dekada,” zbuloi raporti i përbashkët. Europianët po vuajnë nga nxehtësia gjatë ditës dhe janë të stresuar nga temperaturat e larta gjatë natës.
Raporti zbuloi se temperaturat në të gjithë Europën ishin mbi mesataren për 11 muajt e vitit 2023, duke përfshirë shtatorin më të ngrohtë që nga fillimi i regjistrimeve.
Moti i nxehtë dhe i thatë nxiti zjarre të mëdha që shkatërruan fshatra dhe nxorën tym që mbyti qytetet e largëta. Zjarret me të cilat luftuan zjarrfikësit ishin veçanërisht të ashpra në vendet jugore të goditura nga thatësira si Portugalia, Spanja dhe Italia.
Greqia u godit nga zjarri më i madh i regjistruar në BE, i cili dogji 96,000 hektarë tokë, sipas raportit.
“Në vitin 2023, Europa dëshmoi zjarrin më të madh të regjistruar ndonjëherë, një nga vitet më të lagështa, valë të nxehti dhe përmbytje shkatërruese”, thotë Carlo Buontempo, drejtor i shërbimit të ndryshimeve klimatike Copernicus.
“Temperaturat vazhdojnë të rriten, duke i bërë të dhënat tona gjithnjë e më jetike në përgatitjen për ndikimet e ndryshimeve klimatike.”
Roli i ngrohjes globale në reshjet gjithnjë e më të mëdha nuk është gjithmonë i qartë. Ajri më i ngrohtë mund të mbajë më shumë lagështi, duke lejuar stuhi më ekstreme, por ndryshimet komplekse klimatike nënkuptojnë se jo gjithmonë ka predispozitë për të rënë shi.
Raporti nuk jep shifra për numrin e vdekjeve nga nxehtësia në 2023, por shkencëtarët kanë përcaktuar numrin e vdekjeve në 2022, në 62,000 vdekje shtesë.
“Numri i vdekjeve të lidhura me nxehtësinë në vitin 2023 ka të ngjarë të ketë qenë më i lartë”, thotë Friederike Otto, shkencëtare klimatike në Imperial College London, e cila nuk ishte e përfshirë në raport.
Gjithashtu, në raport shkruhet se pjesa më e madhe e Europës përjetoi më pak ditë me borë se mesatarja, veçanërisht në Europën Qendrore dhe Alpet gjatë dimrit dhe pranverës.
Alpet panë humbje të jashtëzakonshme të akullit të akullnajave në vitin 2023, e lidhur me akumulimin nën mesataren e borës së dimrit dhe shkrirjen e fortë të verës për shkak të valëve të të nxehtit.
Gjatë viteve 2022 dhe 2023, akullnajat në Alpe kanë humbur rreth 10% të vëllimit të tyre të mbetur.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
