.png)
Përfaqësuesit e partive spanjolle, Partia Socialiste e Punëtorëve Spanjolle dhe Partia Popullore në Asamblenë Parlamentare të Këshillit të Evropës do të votojnë të martën e ardhshme kundër anëtarësimit të Kosovës në këtë organizatë.
Organi përbëhet nga 46 shtete. Pesë parlamentarët socialistë dhe 3 të tjerë nga PP-ja do të refuzojnë pranimin e Kosovës.
“Do të votojmë kundër sepse ne vazhdojmë të mbajmë të njëjtin kriter”, ka thënë një burim për “Europa Press”, duke iu referuar qëndrimit të Spanjës për mosnjohjen e pavarësisë së Kosovës.
Kjo parti konsideron se tani nuk është koha për hyrjen e Kosovës në këtë organizatë sepse do të mund të “zbulonte hapësira për konfrontim”. Në mesin e 46 shteteve anëtare të KiE-së, janë disa që nuk e njohin Kosovën, përfshirë edhe Spanjën.
As PP-ja, sipas “Europa Press”, nuk ka ndryshuar qëndrim për sa i përket pavarësisë së Kosovës. Burime brenda PP-së i kanë konfirmuar medias spanjolle se do të votojnë kundër sepse “nuk është precedent i mirë” që ky “territor” të bëhet anëtar i Këshillit të Evropës.
Asambleja Parlamentare e KiE-së do të mbajë debat të martën e ardhshme ku do të vendoset se a do të referohet vendimi për anëtarësimin e Kosovës te Komiteti i Ministrave. Ky është organi më i lartë i organizatës, që do të mblidhet në maj në Reykjavik. Ishte pikërisht ky institucion që i kërkoi PACE-s një vit më parë të japë opinion mbi këtë çështje.
Sipas “Europa Press”, kundërshtimi nga tetë përfaqësuesit spanjollë nuk duhet të paraqesë problem për Kosovën. Ka një shumicë të gjerë të vendeve që e njohin Kosovën dhe do të votojnë pro saj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
