Gazeta Si – Islam Dudaev fiton medaljen e artë për Shqipërinë në Europianin e mundjes, që po zhvillohet në Rumani, në Bukuresht. Mundësi çeçen që garon për flamurin kuqezi ka triumfuar sot në finalen e stilit të lirë, në peshën deri 65 kilogramë.
Dudaev mposhti në finale rusin Gadzhimurad Rashidov, me rezultatin 2-1, duke i dhuruar Shqipërisë medaljen e artë në sportin e mundjes. Me këtë sukses Dudaev ka kapur edhe normën e kualifikimit për në Lojërat Olimpike të Parisit.
Shqipëria ka të sigurt edhe një medalje tjetër në Europian, sepse çeçeni tjetër i natyralizuar si shqiptar, Zelimkhan Abakarov, ka shkuar në finale në kategorinë e tij. Ai ka në ‘xhep’ medaljen e argjendtë, por shpresat janë që edhe Abakarov të përsërisë suksesin e Dudaev.
Janë medalje ‘të importuara’ dhe ndoshta nuk shijojnë 100% si ato të sportistëve shqiptarë, megjithatë janë rezultate të rëndësishme në arenën ndërkombëtare, sepse janë arritur nën siglën e flamurit kuqezi. Shqipëria ka tre mundës të huaj të natyralizuar si shqiptarë, çeçenët Dudaev dhe Abakarov, si dhe rusin Valiev.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
