Në mesditën e të premtes opozita shpalli Federatën e Opozitës së Bashkuar ku marrin pjesë aleatët e djathtë të PD-së, si dhe Partia e Lirisë e drejtuar nga Ilir Meta. Në deklaratën e përbashkët që mban tre pika bie në sy mungesa e aleatit të përhershëm të PD-së, kryetarit të LZHK-së, Dashamir Shehi.
Një tjetër aleat i rëndësishëm për PD të paktën në zgjedhjet e fundit parlamentar është edhe Shpëtim Idrizi. Edhe ky i fundit nuk ka firmosur edhe pse sot PDIU-ja përfaqësohet në Kuvend me deputetë që u futën në listën e PD.
Në ngërç është edhe pjesëmarrja e Lulzim Bashës, kur edhe pse Mediu dhe Duka kanë njoftuar se i kanë çuar platformën paraprakisht edhe Bashës për tu bashkuar, dokumenti shoqërohet me një nonsens jo të vogël.
Në deklaratën e përbashkët të Federatës së Bashkuar ndodhet edhe firma e Sali Berishës që logjikisht i bie si kryetar i PD-së sa kohë që partite kanë firmosur në nivel kryetari. Atëherë Lulzim Basha në çfarë cilësie duhet të marrë pjesë në tryezë, sa kohe që me letra gjykate është ai kryetar?
Në dokument është firma e Berishës, por sa kohë që ky i fundit ndodhet në ‘arrest shtëpie’ në tryezën e organizuar në një nga hotelet e Tiranës, PD-ja përfaqësohej zyrtarisht te premten nga Flamur Noka dhe Gazment Bardhi. Ndërsa PL-ja përfaqësohej në tryezë në nivel nenkryetari me Petrit Vasilin
Firma e Berishës dhe njohja e këtij të fundit si drejtues i PD-së edhe nga partite e tjera qe kane firmosur është ngërçi kryesor për ta futur "në vath", jo vetëm Bashën, por edhe Shehin e ndoshta edhe Idrizin sa kohë që tre pikat e Federatës (një ide e iniciuar nga aleatët) janë formale ku mund ta gjejnë veten te gjithë aktorët e opozitës përfshi edhe debatin për reformën zgjedhore
Tre pikat e Federatës së Opozitës së Bashkuar dhe firmëtarët
Deklarojmë sa më poshtë:
1. Institucionalizimin e Federatës së Opozitës së Bashkuar, sipas parimit “Edhe pse të ndryshëm, kemi një qëllim të përbashkët, ndërtimin e një Shqipërie Europiane”, ku përfshihen të gjithë faktorët politikë parlamentarë dhe relevant opozitar, të cilët marrëdhënien dhe bashkëpunimin opozitar, e cmojnë si detyrim dhe jo marrëveshje që fuqizojnë qeverinë dhe antikushtetutshmërinë.
2. Rikonfirmojmë vendosmërinë për t’u përballur me regjimin e korruptuar dhe të kriminalizuar të Edi Ramës, që gjatë qeverisjes së tij ka shndërruar Shqipërinë në vendin e pamundësive për shqiptarët e ndershëm dhe po detyron rininë të braktisë vendin për shkak të pamundësive ekonomike.
3. Shpallim:
i) “garantimin e zgjedhjeve të lira dhe të ndershme”, përmes realizimit të një Reformë Zgjedhore kuptimplotë dhe për adresimin e të gjitha rekomandimeve të ODIHR-it, që siguron një kuadër zgjedhor gjithëpërfshirës dhe të qëndrueshëm, si dhe
ii) “nevojën për të koordinuar përpjekjet për rikthimin e pluralizimit dhe demokracisë funksionale”, si dy prioritete kryesore të axhendës politike të opozitës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.