.png)
Suplementet e kolagjenit janë kudo në mediat sociale por çfarë është kolagjeni dhe a mund t’i bëjë vërtet lëkurën dhe flokët më të shëndetshëm?
Kolagjeni është një proteinë që gjendet në shumë pjesë të trupit, në kërc, kocka, tendina dhe lëkurë. Ndihmon në ndërtimin e një kornize strukturore për të ruajtur lëkurën. Por ndërsa plakemi, prodhojmë më pak kolagjen. Kjo kontribuon që lëkura të duket më pak elastike, madje edhe e varur dhe rrudhat të formohen më lehtë.
Plotësimi me kolagjen është bërë gjithnjë e më popullor vitet e fundit, me markat që pretendojnë se mund të përmirësojë shëndetin e thonjve, lëkurës dhe flokëve. Por nuk ka prova të forta pas këtyre pretendimeve.
Megjithëse disa studime mbi plotësimin e kolagjenit tregojnë për rritjen e elasticitetit dhe përmirësimin e rrudhave në lëkurë, të dhënat shpesh turbullohen nga mungesa e provave ose financimi i studimit direkt nga njerëzit që shesin produktet. Nuk ka asnjë studim që tregon se suplementet e kolagjenit parandalojnë rrudhat.
Suplementet e kolagjenit duken të sigurta por në përgjithësi ekspertët thonë se përdoruesit duhet të jenë të kujdesshëm ndaj shtesave të panevojshme ose joefektive. Në vend të kolagjenit, këshilla është të shpenzoni paratë tuaja në dy produkte që mbështeten nga prova shumë më të mira: krem kundër diellit dhe retinoidë.
Aplikimi i kremit kundra diellit çdo ditë është gjëja më e mirë që mund të bëni për lëkurë të shëndetshme. Retinoidet, të cilat janë komponime që rrjedhin nga vitamina A janë treguar se bllokojnë degradimin e kolagjenit ndërsa rritin prodhimin e tij dhe ato janë provuar se përmirësojnë rrudhat e lëkurës, strukturën dhe elasticitetin në studime të shumta.
“Këto dy gjëra kanë të dhënat më të forta dhe janë relativisht të lehta dhe të lira”, thotë Temitayo Ogunleye, profesor i dermatologjisë klinike në Penn Medicine.
Si përthithet kolagjeni nga trupi?
Suplementet e kolagjenit bëhen duke nxjerrë proteinën nga indet e kafshëve, të tilla si kockat e bagëtive ose lëkura e peshkut. Kolagjeni shitet në pluhura dhe pilula, si dhe në kremra.
Ekspertët thonë se kremrat nuk depërtojnë në shtresën më të thellë të lëkurës ku nevojitet kolagjeni. Pluhurat ose pilulat e gëlltitura kanë, teorikisht, më shumë gjasa të arrijnë atë shtresë nëse absorbohen në qarkullimin e gjakut nga zorrët tona. Por nuk është aq e thjeshtë.
A mbështeten suplementet e kolagjenit nga shkenca?
Disa prova klinike dhe meta-analiza që përfshijnë suplementet e kolagjenit duken paraprakisht pozitive për sa i përket përfitimeve për lëkurën. Por është e vështirë të konkludohet se ndonjë shtesë e caktuar e kolagjenit është arsyeja.
“Shumë nga studimet përdorin suplemente me përbërës të tjerë, duke e bërë të vështirë të zbulosh se cili përbërës mund të jetë duke kontribuar në ndryshimet e perceptuara,” tha Ogunleye. “Ka gjithashtu mungesë standardizimi për matjen e përmirësimit.”
Shumica e studimeve janë kryer vetëm te gratë dhe nuk ka të dhëna të mira për efektin e suplementeve tek njerëzit me tone të errëta të lëkurës.
Burimi: Washington Post. Përshtati: Gazeta Si.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
