Deputetët e grupit parlamentar të drejtuar nga Gazment Bardhi kishin gjetur një mënyrë të re për të pamundësuar normalisht punimet e Kuvendit në fillim të sesionit të ri parlamentar. Ata rrethuan podiumin duke fishkëllyer me bilbila dhe krijuar zhurmë akustike në sallë, një formë e re për t’ju shmangur ndoshta edhe masave të rrepta që parashikon rregullorja e re në përjashtimin e deputetit deri në dy muaj në rast se prish punimet normale të Kuvendit.
Bardhi kërkoi largimin e Gardes edhe përmes disa parrullave, ndërsa nuk u mundësua as fjala e paralajmëruar nga Barjam Begaj i pranishëm në sallë. Begaj lajmëroi më vonë se mesazhin do ta përcjellë nga Presidenca.
Nën zhurmën e bilbilave, mazhoranca miratoi me 73 vota pro dy ministrat e rinj të dekretuar më herët nga Presidenti, Blendi Gonxhe dhe Adea Pirdeni.
Në seancë është votuar nga vendi edhe deputeti më i ri i PS-se që zëvendëson Ahmetajn, Plarent Ndreca
Seanca zgjati vetëm 13 minuta, ndërsa u larguan kryeministri Edi Rama, dy ambasadorët e pranishëm në sallë ai gjerman dhe britanik si dhe Presidenti i Republikës.
Në sallë ishte edhe Lulzim Basha i cili bashkë me Enkelejd Alibeajn qëndruan ulur pa përcjellë asnjë reagim për ish- kolegët e tij në PD.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.