Gazeta Si – Një konflikt për pronat dyshohet se ka qenë zanafilla e përplasjes mes dy vëllezërve Cami nga Bulqiza, që çoi në vdekjen e të dyve mëngjesin e kësaj të enjteje në Tiranë. Ngjarja e rëndë ka ndodhur në në zonën e Freskut në rrugën “Xhon Belushi” rreth orës 07:40.
Policia thotë se Vehap Cami, 63 vjeç ka qëlluar me armë zjarri, duke lënë në vdekur vëllain e tij, Lulëzim Cami, 68 vjeç dhe më pas ka vrarë veten.
Sipas burimeve praprake, Vehap Cami kishte shkuar për të pirë kafenë e mëngjesit në banesën e të vëllait, Lulëzim Camit.
Vehap Cami 63 vjeç, jetonte në zonën e Lundrës. Një ditë më parë ai kishte ditëlindjen, ndërsa mëngjesin e sotëm shkoi në banesën e të vëllait, Lulëzimit, në Fresk.
Pasi u fut brenda, aty u përball me vëllain, por nuk patën asnjë debat. Më pas e qëlloi me pistoletë duke e lënë të vdekur në vend.
Pasi i mori jetën vëllait, Vehap Cami vrau edhe veten. Në momentin e krimit në shtëpi kanë qenë të pranishëm edhe familjarët e Lulëzim Camit, të cilët fatmirësisht nuk pësuan asnjë lëndim.
Grupi hetimor dyshon se përplasja mes vëllezërve ka qenë e hershme për shkak të pronave në Bulqizë. Për këtë arsye po pyeten edhe familjarë të tyre për të dhënë më shumë informacione që ndihmojnë hetimin.
Në vendngjarje kanë shkuar forcat e policisë dhe kanë bërë rrethimin e zonës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
