Gazeta Si – Afrika e Jugut iu drejtua Gjykatës Ndërkombëtare të Drejtësisë në Hagë duke akuzuar Izraelin për kryerjen e gjenocidit në Rripin e Gazës.
Afrika e Jugut ka kërkuar një urdhër urgjent të gjykatës ndërkombëtare për të ndaluar bombardimet e ushtrisë izraelite dhe të gjitha operacionet ushtarake, duke argumentuar se veprimet e saj shkelin të ashtuquajturën Konventën e Gjenocidit, një traktat ndërkombëtar i miratuar nga Asambleja e Përgjithshme e OKB-së në vitin 1948 dhe ratifikuar nga Izraeli.
Gjykata Ndërkombëtare e Drejtësisë është organi kryesor gjyqësor i Kombeve të Bashkuara, i krijuar për të zgjidhur mosmarrëveshjet midis shteteve.
Megjithatë, dënimet e saj janë injoruar shpesh në të kaluarën: në mars 2022, për shembull, gjykata urdhëroi Rusinë të ndalonte sulmin e saj ushtarak në Ukrainë, përsëri në bazë të Konventës së Gjenocidit, pa arritur asgjë.
Të vërtetosh nëse lufta në vazhdim mund të klasifikohet ligjërisht si gjenocid, është mjaft e vështirë për momentin dhe mund të marrë shumë kohë.
Konventa e vitit 1948 e cituar nga Afrika e Jugut, të cilën Izraeli e ratifikoi në vitin 1950, është një traktat ndërkombëtar që jep përkufizimin e gjenocidit mbi bazën e të cilit organet ndërkombëtare përcaktojnë praninë ose mungesën e një akti të tillë dhe gjykatat ndërkombëtare përcaktojnë përgjegjësitë dhe dënimet e mundshme.
Ajo gjithashtu lejon çdo shtet të padisë një tjetër përpara Gjykatës Ndërkombëtare të Drejtësisë, edhe pse ai nuk është i përfshirë drejtpërdrejt në operacionin ushtarak në fjalë.
Kushtet e vendosura nga Konventa për të folur për gjenocid janë mjaft të sakta, por ka një element që e bën çështjen më të ndërlikuar, që është “qëllimi për të shkatërruar, tërësisht ose pjesërisht, një grup kombëtar, etnik, racor ose fetar si të tillë”.
Praktikisht do të thotë që të flitet për gjenocid, duhet vërtetuar se kushdo që e ka kryer aktin ka pasur qëllim të shfarosë një grup njerëzish si të tillë dhe kjo nuk është e lehtë.
Në dokumentet e depozituara nga Afrika e Jugut thuhet se “veprimet dhe mosveprimet e Izraelit të denoncuara nga Afrika e Jugut janë të natyrës gjenocidale sepse synojnë të shkaktojnë shkatërrimin e një pjese të konsiderueshme të grupit kombëtar, racor dhe etnik palestinez”, por për të arritur një denim, mund të duhet një kohë e gjatë, veçanërisht, sepse qasja në Rripin e Gazës është plotësisht e bllokuar dhe nuk është e mundur të ngrihen akuza në bazë të hetimeve të pavarura.
Që nga fillimi i luftës midis Izraelit dhe Hamasit në tetor, Afrika e Jugut ka qenë shumë kritike ndaj Izraelit, duke pezulluar të gjitha marrëdhëniet diplomatike.
Ministria e Jashtme e Izraelit u përgjigj në një deklaratë se “i hedh poshtë me neveri” akuzat e Afrikës së Jugut, të cilat janë “pa bazë faktike dhe ligjore”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
