Gazeta Si – Ish-kryebashkiaku i Bulqizës, Lefter Alla është dënuar me 2 vite burgim për shpërdorim detyre nga Gjykata e Posaçme kundër Korrupsionit dhe Krimit të Organizuar.
Alla u shpall fajtor së bashku me 8 persona të tjerë për akuzat e shpërdorimit të detyrës, shkelje të barazisë në tendera dhe falsifikim të dokumenteve, në lidhje me projektin e një ujësjellësi në Bulqizë me vlerë 3.2 milionë dollarë.
Trupa gjykuese e dënoi me 3 vite burg Lefter Allën, por për shkak të gjykimit të shkurtuar do të vuajë përfundimisht 2 vite heqje lirie.
Në 21 dhjetor, Lefter Alla i kërkoi gjykatës që ta shpallte të pafajshëm dhe të mos pranonte kërkesën e SPAK.
Ndërsa 10 ditë më parë, prokuroria kërkoi 3 vite e 6 muaj burg për Allën, 3 vite për Enkeleda Lleshin, për vartësit e tjerë dhe biznesmenin që kreu punimet e ujësjellësit kërkoi 1 deri në 4 vite burg.
Të gjithë të pandehurit përfitojnë gjykim të shkurtuar. Sipas SPAK, ata kanë kryer veprime aktive të kundërligjshme për paracaktimin e fituesit megjithëse subjekt nuk i përmbushte të gjitha kriteret.
Edhe pse fitues rezultoi Rasim Daci, punimet për ujësjellësin u kryen nga Aqif Konesha, një lidhje e kryetarit të bashkisë Lefter Alla.
Lefter Alla mbante postin e kryetarit te bashkisë që prej qershorit të vitit 2019. Arrestimi i tij ndodhi dy muaj larg zhvillimit të zgjedhjeve lokale që pritet të mbahen më 14 maj.
Të dënuarit e tjerë
1 vit e 8 muaj burg Enkelejda Lleshit, lirohet me kusht
Nga 14 muaj burg Rubin Kolës, Arsen Gjokës e Kujtim Zogut, lirohen me kusht
Leonard Daci dënohet me 1 vit e 2 muaj burg, lirohet me kusht
Erion Isaku dënohet me 2 vite burg
Rasim Daci dënohet me 1 vit e 8 muaj burg
1 vit e 4 muaj burg Aqif Koneshën, i afërmi i Lefter Allës
Dënohet me 1 vit burg, Dali Gazidedja, lirohet me kusht
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
