Gazeta Si – Një 42-vjeçar me iniciale M.O., ka përfunduar në pranga pasi pak ditë më parë kishte vjedhur një automjet në Tiranë.
Makinën e vjedhur autori e kishte dërguar më pas në servisin e tij në fshatin Gjoricë në Dibër.
Bashkë me 42-vjecarin u procedua penalisht një i mitur, i cili dyshohet se është përfshirë në këtë veprimtari.
Policia thotë se 42-vjeçari, më 15 dhjetor të këtij viti ka vjedhur një “Golf” në rrugën “Mikel Maruli” në Tiranë në zonën e Astirit.
Gjatë kontrollit të ushtruar në servisin e 42-vjeçarit në fshatin Gjoricë, shërbimet e Policisë gjetën automjetin me të cilin ka lëvizur ditën që ka kyer vjedhjen, automjetin e vjedhur, pjesë motorike automjetesh të tjera, të dyshuara të vjedhura, të cilat u sekuestruan në cilësinë e provës materiale, së bashku me veshjet që autori ka përdorur gjatë ngjarjes.
Po ashtu, nga veprimet hetimore të kryera dyshohet se 42-vjeçari, më datë 7 prill të këtij viti ka vjedhur një automjet në rrugën “Ndre Mjeda”.
Më herët, rezulton se Osmani ka vjedhur makina, të cilat kryesisht i merrte për t’i shitur për pjesë në servisin e tij në vendlindje. Gjurmimi për makinën e vjedhur në Astir nga agjentët e Komisariatit nr. 6 u bë nga këqyrja e kamerave të sigurisë.
Sipas burimeve paraprake, M.O., përdorte një teknikë të veçantë për të vjedhur automjetet, kryesisht në Tiranë, të cilat më pas i shiste me pjesë në Gjoricë. Fillimisht makinat i merrte me qira dhe kopjonte çelësin e tyre, por i kthente te pronarët në kohë.
Vjedhjen e makinës, së cilës më herët i bënte kopje të çelësit, ai e bënte 6 muaj apo 1 vit më vonë, njëlloj siç bëri edhe në rastin e fundit. Siç shihet edhe në pamjet e kamerave të sigurisë të shpërndarë nga policia, Osmani hap makinën me lehtësi dhe më pas largohet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
