Raporti: Firmat farmaceutike kineze përdorin pjesë të trupit të kafshëve në ilaçe

Tre kompanitë kryesore farmaceutike kineze, të cilat mbështeten nga bankat më të mëdha globale, po përdorin pjesë të kafshëve të rrezikuara në ilaçet e tyre, sipas një hetimi nga një grup ekspertësh për mbrojtjen e mjedisit.

Në një raport të bërë publike të hënën, Agjencia e Hetimeve Mjedisore në Mbretërinë e Bashkuar (EIA) tha se kishte gjetur 72 kompani të licencuara nga rregullatori kinez i drogës dhe ilaçeve, që përdornin pjesë të trupit të leopardëve dhe pangolinëve, dy specie që përballen me kërcënimin e zhdukjes.

Midis tyre janë tre gjigantë të listuar publikisht të mjekësisë tradicionale kineze (TCM): Beijing Tong Ren Tang, Tianjin Pharmaceutical dhe Jilin Aodong Medicine.

EIA tha se kishte gjetur të paktën nëntë “produkte të deklaruara se përmbajnë përbërës të nxjerrë nga trupi i leopardit dhe pangolinës” që ishin prodhime të këtyre firmave.

Disa nga kompanitë e identifikuara shesin gjithashtu produkte që përmbajnë pjesë të tigrave dhe rinocerontëve, gjë që do të kundërshtonte “qëndrimin e deklaruar të vetë Kinës se nuk lejon përdorimin e kockave të tigrit dhe bririt të rinocerontit në mjekësi,” tha organizata.

CNN ka kontaktuar me firmat farmaceutike, Tong Ren Tang, Tianjin Pharmaceutical dhe Jilin Aodong për koment.

Markat e tyre janë jashtëzakonisht të njohura në Kinë. Tong Ren Tang, e themeluar në vitin 1669, është një nga markat më të njohura të Kinës. Ajo e konsideron veten si ofruesin e vetëm të mjekësisë kineze për familjet mbretërore “për 188 vjet gjatë mbretërimit të tetë perandorëve” dhe që atëherë është rritur për t’u bërë prodhuesi më i madh në botë i TCM.

Vitet e fundit, qeveritë në mbarë botën kanë rritur mbrojtjen ligjore për disa kafshë të rrezikuara, përfshirë Kinën.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.