.png)
Gazeta Si – Trajneri Silvinjo ka shpallur sot listën e 25 lojtarëve të grumbulluar për ndeshjet me Çekinë dhe Bullgarinë. Priteshin risi në këtë listë, por i vetmi që i bashkohet grupit në krahasim me ndeshjet e fundit, është Armando Broja.
Sulmuesi i Çelsit rikthehet pas një mungese të gjatë. Ai u dëmtua dhjetorin e vitit të kaluar, kreu një ndërhyrje kirurgjikale dhe javët e fundit është rikthyer me Çelsin, duke marrë minuta si zëvendësues dhe pastaj si titullar. Një ‘armë’ e fortë për trajnerin brazilian ndaj Çekisë.
Në listë janë pastaj gjithë emrat e zakonshëm, me përjashtim të Odise Roshit. Pritej një ftesë për Arbnor Muçolli, i cili ka bërë një paraqitje shumë të mirë në kampionatin suedez, por nuk bën pjesë në listë këtë herë.
Shqipëria do të nisë përgatitjet të hënën, më 9 tetor, në “Shtëpinë e Futbollit”. Lojtarët do të grumbullohen në kryeqytet, ku është programuar që trajneri Silvinjo të dalë në konferencë për mediat ditën e shtunë, prej orës 11:00.
Kombëtarja do t’i luajë në “Air Albania” të dyja ndeshjet e tetorit. Fillimisht me Çekinë më 12 tetor, prej orës 20:45, ndërsa më pas në program është miqësorja me Bullgarinë më 17 tetor, ora 18:00.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
